《救人七命》韋史密夫自稱稅務員，掌管財政，不論老弱病殘，甚或冇錢，佢都會無償幫你！但唯一要求係證明你係好人。好多人睇完都話好有Meaning但唔太明！今次出碟，Bonus用咗導演、編劇、幕後人員七個觀點作完美解畫，當中竟然涉及中國「因果業報」道理，呢度講晒你知就冇癮啦，想明就自己買碟睇啦！
記者：陳國輝
幫七個陌生人
一場嚴重車禍，令七個人喪命，也改變咗賓湯馬斯（韋史密夫飾）嘅一生。本來佢事業有成，婚姻美滿，但車禍之後一直感到極之內疚並意志消沉，為咗贖罪，佢決心幫七位素未謀面嘅陌生人，渡過難關；然而到救贖行動最後階段，佢發現靠個人力量無法令大家快樂，佢決定送出一份最特別嘅禮物。
送毛巾抹眼淚
睇過《Iamlegend》都知，阿Will演技精湛，全程「騷奴」梗係冇問題，不過從未想過原來佢可以催人淚下！呢次DVD及Blu-ray版特別附送魔術毛巾，本來筆者都以為阿Will呢個角色只係識玩魔術，媾吓女，出發點好單純，點知錯晒！戲內阿Will其實係一位悲情男，佢不斷幫人、贖罪、再幫人，到臨尾結局仲鬼咁凄凉，萬一定力唔夠，就要出動呢條魔術毛巾，拆開佢抹面珠隔籬兩行眼淚，發行商真係夠體貼。
除咗呢份禮物，Bonus仲包括好多特別收錄，例牌者當然唔少得刪剪片段、導演專訪等行嘢，而針對劇情，亦加插兩段關於水母及印刷機嘅資料介紹，雖然幾分鐘貨仔，但睇得出有用心準備，加上罕有提供全中文字幕，百幾蚊買隻DVD返屋企，梗係要嗒盡佢啦！
救女變追女
戲中是否救咗七人？老實講，睇完都忘記得一乾二淨，若然每一段救人經歷都太細緻，又怕失去重點；導演好叻，最後只Highlight阿Will與財困兼患絕症女子那一段感情，尤其救贖至產生愛情呢個階段，本來女子已認定一死，但阿Will出現令佢重新振作，還與死神對抗，最後更不自覺墮入愛河，聽落似見慣嘅愛情片，但係《Seven》成功將關懷移植到呢位女子以及其餘六人身上，令結局更催淚。
Profile
戲名：救人七命
類型：劇情片
語言：英、泰
字幕：中、英、韓、泰
片長：約123分鐘
特別收錄：七個觀點看故事、完美組合的創造、世上最致命的客串演員、印刷藝術的熱情、刪剪片段
