舒淇、張震和劉嘉玲前晚在上海出席王家衛成立新公司的派對，嘉玲表示在新戲飾演武則天，並要學騎馬，粉碎她的懷孕傳聞。曾傳緋聞的舒淇和張震前後腳現身扮生疏，但二人在派對內卻放開懷抱面貼面咬耳仔，表現相當親密，飲到面紅紅的舒淇更high到舉起V字手勢。
王家衛成立的公關公司AxisMundi前日在上海舉行成立記者會，晚上舉行慶祝派對，不少好友現身祝賀。曾傳緋聞的舒淇和張震則前後腳現身行紅地毯，似乎刻意避免同場，但當兩人入到派對場內，即完全拋開顧忌面貼面傾密偈。
期待康城艷遇
兩杯落肚後，舒淇和張震越行越埋，之後更放開懷抱面貼面咬耳仔，狀甚親密，即使身邊友人示意給舒淇知有記者影相，她也完全沒有理會，更舉起V字手勢狀甚風騷。
舒淇接受訪問時表示稍後擔任康城影展評審，雖然她曾做過柏林影展的評審，但仍感到壓力。至於感情方面，舒淇笑說：「我一直有拍拖，同工作拍拖囉，睇吓喺康城有冇艷遇。」舒淇出席派對前，身穿低胸晚裝出席了另一個活動，她透露在新戲中有武打場面，故此要狂練肌肉，至於會否練英語以出席康城影展？舒淇坦承英語麻麻，但卻認為臨急抱佛腳沒有很大作用。
劉嘉玲前晚撇下老公梁朝偉單拖現身，身穿紅色泰山裝的她露出香肩，明艷照人。她透露已接拍徐克執導的電影《狄仁傑》，飾演武則天，她說：「下月就會開拍，我要學騎馬同宮廷禮儀，有老師教我，我都好有興趣，但騎馬都有啲驚，因為冇乜點騎過。」
嘉玲又透露偉仔近日忙練詠春，經常找她練黐手，並表示偉仔已練到有六嚿腹肌。至於早前被傳懷孕，嘉玲笑說：「拍戲又點會有BB？」
張智霖教仔炒股
另外，張智霖也有出席派對，有傳他的囝囝拍廣告身價僅次於謝霆鋒的囝囝Lucas，他聞言說：「有咁嘅事？其實一直都有人搵，但未開價我哋已經推咗，因為冇必要，佢冇演戲細胞，呢行又辛苦，我哋唔想佢入呢行，想佢做老闆，我哋會教佢投資同睇股票。」
採訪、攝影：曾小嘉
