港大學生將陳一諤拉落馬，好似法官否決電盈私有化咁，真係大快人心，證明公義必勝，歷史係不容歪曲嘅，港大學生會超級老鬼何俊仁話今次真係一額汗，證明港大未完全赤化先冇咁驚。呢次應該係港大學生會首次公投將會長除名，陳一諤唔止史上留名，仲寫下多個歷史紀錄，前無古人，八方希望後無來者。
話罷免程序違反憲法
陳一諤今年2月中當選會長，上任兩個幾月就要落台，相信係歷來任期最短會長，雖然佢在位時間唔長，不過是非卻甚多，不斷有人鬧佢係「隱形左派」，因為由佢參選上莊開始，已俾人揭發佢同左仔有來往，背景唔係咁簡單。
事實證明佢後台真係夠晒硬，上星期公投期間，傳出中聯辦暗中撐佢，校內出現神秘大字報幫佢平反，左報亦開動宣傳機器挺佢，咁大陣仗保住一個學生會會長，勞師動眾形同為民建聯助選幫葉劉拉票，背後點會冇景轟？
有人力撐，難怪陳一諤夠膽口出狂言，批評天安門學運領袖「走佬」，又淡化屠城暴行，講咁多為中共塗脂抹粉嘅言論，恐怕自甘做奴才嘅成龍都要大嘆青出於藍，寫個服字，論口臭亂噏荒謬程度，八方認為兩人暫時難分高下。
陳一諤言論實在太離譜，港大學生已經用選票反映對佢不滿，有成1,500票轟佢下台，可見佢幾咁乞人憎，甚至犯眾憎，連中大學生會都發表聲明批評佢，可以話係香港學界創舉，不過就算俾人鬧到落台，陳一諤仍然好厚面皮唔認衰，喺自己個blog度話，今次事件令港大學生會、港大同學、香港社會更多人反思同討論六四事件，所以佢「對歷史也並非毫無貢獻」，又質疑公投罷免程序有違反會章憲法嫌疑，似乎想為自己翻案。
陳一諤自詡貢獻歷史，好多人亦對佢捨身成仁、成為烈士而高興，港大學生送佢一程仁至義盡，大讚佢係回歸後特區「青年才俊」典範人物，屬於近年愛國陣營不可多得人才，09年最左新人當之無愧，八方睇好佢日後飛黃騰達、前程錦繡，千祈唔好學梁振英、葉劉之流轉軚變臉，令大家失望啊！
mailto:[email protected]