白鴿黨議員李華明早前派助手北上，踢爆南山供港蔬菜加工場，竟然有「真標籤、假產地」嘅菜賣嚟香港，呢件事特區政府同深圳方面都好緊張，前日深圳方面仲特登請肥仔明同黃容根上深圳，就呢單嘢解畫。
肥仔明返嚟香港後同八方講，去到深圳令佢受寵若驚，事關佢同黃容根得兩個人，對方卻一大隊人輪流解畫，個個官員左一句「李主席」、右一句「李主席」（肥明乃立會食物安全及環境衞生事務委員會主席）向佢滙報事件，講到超晒時之餘，仲拉埋佢大合照。
深圳班官仲驚死肥明唔信佢哋有做嘢掃蕩假證菜，帶埋佢睇已被封舖嘅出口商辦事處，證明無花無假，肥明話做議員咁耐，未試過獲內地官員咁好招呼，今次真係奇遇！