【北京直擊】久未露面的大美人關之琳，昨日在北京回應和已婚台灣富商陳泰銘的緋聞時，指兩人只是普通朋友，關係並非外傳般複雜。面對圈中一片熟女紅星復出潮，之之直言「復出需要好大勇氣」，她寧願繼續嘆世界，入場睇戲食爆谷。
現年46歲的關之琳，繼去年底被發現和53歲台灣電子業大王、已婚富商陳泰銘撐枱腳後，上月又被影到和陳泰銘以及陳的家人在台北嘆日本菜。近年養尊處優的她昨晚在北京出席時裝名店詩韻（TheSwank）的旗艦店開幕禮，她穿上近4萬元的ErmannoScervino露肩裙，性感高貴，並跟名店高層一起巡舖和祝酒。
之之很識做，一開口就自封店舖捧場客，大談當年入行已在詩韻買衫。問到她和陳泰銘約會，她自在地說：「大家朋友食飯，唔係大家想像中複雜，大家炒大咗去睇啫。」陳泰銘是否有妻室？之之說：「關係冇咁複雜，你哋問番佢啦。」
「唔會為結婚而結婚」
之之07年宣佈退出影圈，談到近期林青霞和鍾楚紅等女星相繼復出，之之謂不會考慮：「復出需要好大勇氣，唔會喇，家過咗20幾年呢種生活，心態好平靜，完全冇戲癮，再拍可能好生暴。噚晚撞到《畫皮》導演（陳嘉上），佢開口問我拍唔拍，我搖頭佢都明白。」
在眾多導演中，之之謂欣賞馮小剛，她也表示期待看青霞和紅姑的新片，入場做觀眾，她說：「我享受食爆谷，佢哋就好辛苦，我以前都經歷過，係非人生活。」46歲的她也不顯老，之之表示秘訣是「平常心、樂觀」，感情事也隨緣，她說：「我暫時都滿意生活，唔會為結婚而結婚，搵到合適對象先。」
採訪、攝影：丁寧
