呢輪巿面都幾靜，冇乜新款AV產品推出。小藍早幾日行開時代廣場，咪巡吓日本潮店JCShop睇吓有冇新嘢返囉。老闆Alan見我頹頹哋，勸我唔好掛住匿埋屋企玩影音，家好多後生仔已經衝出間房，揸住部MP4隨街睇戲。
手提DVD機播RMVB片
Alan話喺日本新返咗一批全球首部可支援RMVB格式嘅Soundtech手提DVD機。家網上影片好多係RMVB格式，一齣90分鐘嘅電影可壓縮到300幾MB，質素又唔差；而MPEG4壓縮嘅電影則要成1GB，「RMVB格式嘅電影一般要喺電腦睇，家部份MP4都讀到，但係個屏幕得兩、三吋又細得滯。呢部7吋芒嘅手提DVD機出街夠晒睇。」
Alan笑笑口話，一張4GB卡可儲存10幾齣RMVB電影，帶部機去公幹唔怕一個人喺酒店冇嘢做，「部機仲可以睇埋電視，賣980蚊，係咁嘅時勢，都算抵玩啦。」
佢又話，想玩得激啲，出街同人哋Jam歌，可以試吓佢哋新賣嘅美國ThinkGeek品牌兩款潮Tee──電子打鼓Tee同喇叭Tee。Alan即場示範，着起件心口貼咗塊膠狀嘅七個電子鼓圖案黑色Tee，咁冇乜特別啫？點知Alan儍咗咁狂打心口（啲鼓）。吓，竟然會「嘭嘭」聲，發出唔同鼓聲，像真度都幾高吓，好鬼過癮。
吓吓打心口，呢件鼓Tee未必啱女仔，潮女可考慮心口裝上喇叭嘅喇叭Tee，內置咗20首歌同聲效。但想做潮人都唔易，每款Tee賣880蚊。