奇蹟唔出現就要喺今年9月退休嘅金管局任總，起身前都要受議員煎熬，就雷曼迷債事件作供時，先為「先知先覺」言論道歉，日前又再爆出佢獲豐厚花紅，令唔少受金融海嘯打擊嘅小市民嘩然。對任總絕不手軟嘅詹培忠，就去信立法會財經事務委員會，要求主席陳鑑林召開特別會議，追究任總逆市加人工、發花紅事件。
社民連陳偉業亦有同樣要求，指任總如果有半點歉疚之心，應該將花紅拎番出嚟退回庫房以息民憤。佢下個月會提出動議，要求港府全面改革金管局，任由獨立王國繼續隻手遮天，唔使上海出手，香港遲早自動失去國際金融中心地位。
促新總裁定任期減人工
金勞詹同陳偉業諸多動作，其實只係前菜，如果任總真係退休，金管局如何做大手術被人整治與他何干？而且無論如何任總份花紅都袋袋平安，因此議員要炮製嘅並非任總，而係準備埋位嘅「攞命陳」陳德霖。事實上陳偉業表明要削減金管局大權，對攞命陳而言，最攞命嘅相信係議員要求日後金管局總裁合約要寫明任期，而且要減人工。
眾所周知，任總份工冇任期，又年年加人工，年薪冠絕全球央行行長，堪稱全港，應該係全宇宙超國寶級筍工。最有機會接任呢份筍job嘅攞命陳，見到家陣時勢政治壓力輿論情緒，應該都唔敢奢望咁富貴，但就算減少少人工，點睇呢份工都仲係勁筍。何況議員得把口，政府大可當佢哋講笑話發牙痕耳邊風，照舊高薪厚祿都奈佢唔何。
有人使橫手叫銀行賠錢
政府唔怕議員，最怕7.1遊行人數，恐防任總等財金高官又失言掀起上街人潮。噚日有消息傳出，有人正使橫手，「建議」個別銀行盡快賠償畀老弱傷殘目不識丁雷曼苦主，令佢哋收錢後落咗道氣，唔好再跟人上街，咁就皆大歡喜。呢招擺明學澳門鏵哥派錢減少五一遊行人數，至於苦主係咪真係會收到好消息，八方拭目以待。
苦主未收到錢都有機會苦中作樂，據涂謹申講，任總堅拒公開嘅雷曼報告機密內容根本冇料到，相信任何人睇完後都會失笑、恥笑、苦笑。
mailto:[email protected]