名模姚書軼（Mikki）、AmandaStrang同DHC廣告女郎Sevara，噚日喺中環示範卡地亞高級珠寶系列，每人都戴上二、三千萬首飾，非常珠光寶氣。當中Mikki戴咗一條超過1,500萬嘅紅寶鑽石頸鏈，Mikki話戴住都心跳，但唔恨擁有，佢話：「戴過開心就夠，我鍾意鑽石保值，都鍾意colorstones，覺得佢哋好似藝術品咁。」
「會掛住多啲」
Mikki話自己都有少少家傳紅寶石，係當年阿爺送畀阿嫲嘅首飾，Mikki話舊年都買咗兩粒細細哋嘅紅寶，自己設計鑲做首飾。Mikki之前表示要搬離同男友曾智超同住嘅居所，佢噚日話已經搵到新屋，家準備搬，但佢唔認準備分手，佢話：「唔係分手，我哋一齊住咗6年，有啲太習慣嘅感覺，我想keep住啲火花，所以想分開住，咁樣會掛住對方多啲。」佢話以往水電雜費大小事務都依賴男朋友，家要慢慢開始適應。