無緣連任會計界議席嘅譚香文不甘寂寞，噚日忽然現身醫務委員會紀律聆訊，為星港醫療中心旗下四名涉嫌專業失德女西醫撐場，十分無厘頭。
譚香文稱唔認識四名醫生，睇報紙後覺得醫委會對四人指控好唔公平，「就算有宣傳，都係間醫療中心犯規，應該唔關醫生事，家金融風暴，佢哋如果俾醫委會停牌，就連飯碗都打爛埋。」譚香文係以公眾人士身份旁聽聆訊，當醫委會法律代表提醒公眾人士，除記者外唔准抄寫聆訊內容嘅規定時，譚香文喺旁聽席大嗌呢啲規矩無稽，令全場O晒嘴。
醫委會本月初審理呢單案，認為表面證供成立，昨首次聆訊，但辯方律師要求撤換今次主持聆訊嘅史泰祖醫生，聆訊要再押後。