日本女星藤原紀香早前宣佈離婚，佢好快就投入工作，噚日佢就喺錄影廠開記者招待會，宣傳嘅新劇《老公得了抑鬱症》，係佢婚變後首齣日劇。劇中紀香原本有一個幸福美滿家庭，但由諧星原田泰造飾演嘅丈夫患抑鬱症，紀香要負責起維繫家庭嘅責任。不過最令觀眾驚喜就係紀香個師奶look造型，同佢平日性感女神形象完全相反。