重踏維園，往事並不如煙；心痛，一揪就是20年。歲月把希望輾得支離破碎，填詞人周禮茂卻說，「忘不了的，年月也不會蠶蝕」。16年前，周為《自由花》譜詞，沒想到一唱至今，成為每年六四燭光集會的「我最喜愛歌曲」，他深信六四終會平反，希望這首歌曲可以抹乾群眾的眼淚，鼓勵人繼續堅持下去。
屠城那晚，從事廣告業的周禮茂開夜班，看到電視新聞，感到可怕和不安，翌日跟同事說起，有人憤怒到「爆玻璃」，「我記得自己有一日成日唔開心，唔返工，但當時（工作上）孭緊好重飛，之後要做返朝十晚十補番，同事講起都好唔開心，記得嗰時有人好激動打爛玻璃。」
「終有一日完成夢想」
1993年，唐書琛聯絡周禮茂請他譜詞，「佢話希望每年都用呢首歌嚟紀念。我記得好趕，好似得幾日時間，當時淨係諗，唔應該再係用番六四嗰段時候嘅心情，未來漫漫長路，唔可以停留喺過去嘅哀愁同埋激動之中。」
「呢首歌嘅歌詞抱有好大希望，只要努力，自由可以開到花；唔好放棄，終有一日可以完成夢想，因為要年年唱，訊息一定要正面，嗰時無諗過首歌咁多人唱，可以陪咗大家咁多年，我覺得好榮幸。」
《自由花》寄調台灣歌手鄭智化的《水手》，原曲講述船隊在大海航行困難，當年在中國大陸十分流行。1993年民運人士王希哲獲釋，接受傳媒訪問時哼了該曲的副歌部份，「他說風雨中這點痛算甚麼，擦乾淚不要怕至少我們還有夢。」支聯會成員看到訪問後，覺得十分有意思，就請人重新寫詞，這個人就是周禮茂。
「年年出嚟唔係多餘」
周禮茂填詞時未聽過原曲，卻同樣寫出對夢想的期盼。他自言性格較悲觀，不想影響到別人，「我已經等到有少少攰，以前比較多空間寫呢類歌，我亦都多呢啲火。家冇以前咁多怒氣，好多時捱過就算，有個心，但唔會去行動，唔覺得會有啲咩點變。」
雖然如此，心底裏他仍深深相信某年某夕始終會變真，「年年出嚟嗰種堅持唔係多餘，我諗仲有好多人仲堅持緊，但未必走出嚟表達，生活上要煩呀、要忙呀，但個心仲喺度。同埋我覺得國家唔會視而不見、聽而不聞，佢哋唔會唔知嘅，只不過佢要搵時機（平反）。我唔知佢乜嘢時機啦，不過我哋要繼續發聲囉。」
記者張嘉雯
自由花
曲：鄭智化
詞：周禮茂
忘不了的，年月也不會蠶蝕，心中深處始終也記憶那年那夕；
曾經痛惜，年月裏轉化為力，一點真理，一個理想永遠地尋覓。
悠悠長長繼續前航不懂去驚怕，荊荊棘棘統統斬去不必多看它，
浮浮沉沉昨日人群雖不說一話，不想清楚分析太多真心抑意假。
＊
但有一個夢，不會死，記着吧！無論雨怎麼打，自由仍是會開花，
但有一個夢，不會死，記着吧！來自你我的心，記着吧！
忘不了的，留下了不死意識，深深相信始終會變真某年某夕；
如此訊息，仍賴你跟我全力，加一把勁，將這理想繼續在尋覓。