當外間點樣大讚巴塞隆拿嘅「三叉戟」厲害，查實幕後都要有位指揮家提供彈藥先見威力，呢位舉足輕重嘅人物就係恩尼斯達喇。呢位「白面指揮家」周三自己入一球，再交出3個助攻，結果幫巴塞大勝西維爾4:0，4球都關佢事！正如伊度奧賽後話齋：「佢先係世上最佳球員！」
入一粒再加3次助攻
巴塞呢期興大炒對手，歐聯數完拜仁4粒，西甲再炒西維爾4蛋，直頭當對手冇到。唉，巴塞呢場冇出美斯都咁勁，試問當今世上邊隊頂得住？箭頭伊度奧、美斯同亨利勁就係人都知，其實呢個「三叉戟」頻頻入波，背後做支援角色嘅恩尼斯達都極重要；呢位白面仔今場先嚟個笠射先開紀錄，跟住再助攻伊度奧、沙維同亨利入波，「球場指揮家」呢個美譽非佢莫屬。最緊要巴塞又帶挈球迷熱開1.8倍「主勝」，隊波長捧長有。
伊度奧呢場又有進賬，家陣已入咗27個聯賽入球，排喺射手榜首位，睇番05/06球季，即係伊度奧攞神射手嗰季，佢都係以26球榮膺，僅多韋拿一球；今季西甲仲有成6周，佢經已入夠27球，就證明「弗」到無倫。嗰邊華倫嘅韋拿周三同樣梅開二度，暫時入咗25球，今年又係佢同伊度奧拗手瓜爭神射手，好睇過戲。
伊度奧：佢全世界最勁
伊度奧咁成功，都不忘隊友恩尼斯達嘅演出：「好多人都話美斯係當今最佳球員，我就話係恩尼斯達！」好彩伊度奧啱啱拒絕咗曼城3,900萬鎊嘅開價，唔係我哋出年就冇「三叉戟」睇咯。現時巴塞32戰得81分續排榜首，仍然領前皇馬6分，嚟緊5月3日巴塞作客皇馬嘅國家打吡，球迷一定要實呀！
巴塞咁鬼正氣，嗰邊嘅皇馬就多負面新聞。中堅比比上場對基達菲刻意踩落卡斯基路背脊度，嚟緊面臨停幾場處分，日前佢出嚟公開道歉之餘，仲誇到話唔再踢波，考慮轉行喎。加上希古恩又同荷蘭黨炒完一鑊，要追巴塞真係難過登天！