計錯數似乎係財政司司長宿命，庫房盈、赤，經濟增長、失業率、通漲數據、港交所股價無次睇得準，真係邪得交關，最新計錯數事件竟然係預算案箍凸票，好離奇。
立法會噚日凌晨時分表決預算案，事前財爺鬍鬚曾擔心贊成票創新低，所以成日扮死狗四出求票，苦戰多日出盡法寶講到口水乾牙血出，總算成功箍實保皇黨，民建聯黃容根押後做手術，勞聯李鳳英唔理腳傷都返立法會㩒掣，工聯會黃國健更押上家庭和諧，寧願放棄去澳洲見證獨生子大學畢業，懶理老婆黑面，亦要留守香港做救火隊，結果預算案以34票通過，鬍鬚曾幸不辱命。
漠視「民睏」議員不滿
鬍鬚曾執身彩，其他議員卻有唔少微言，事關已表態支持預算案嘅李國寶同詹培忠，竟然喺最後關頭唔見人冇投票，原來兩個人都頂唔住睡魔急call，返咗屋企會周公！由此可見，如果高官狗仔隊落力箍實佢哋兩票，預算案就可以36高票通過，換句話說，鬍鬚曾根本定過抬炸彈，有好多位走盞，有議員私下埋怨，既然政府夠票有凸，就唔使迫議員揸枴杖開會，更唔使黃國健犧牲家庭幸福，仲要花多4,000幾蚊換機票啦。
鬍鬚曾成日話一票都不能少，實情卻係少兩票都得，箍票都計唔準條數，令人對佢數口再打折扣。寶哥哥同金勞詹受惠於鬍鬚曾「紓解民睏」措施，可以返屋企大覺瞓，令到要捱眼瞓做舉手機器嘅議員「恨」到流口水，有人聲言如果鬍鬚曾下次再漠視「民睏」，一定唔會再捱義氣留喺度投票，我哋有義，你卻無情，點講得通？所以財爺下年最好明確承諾有甚麼「紓解民睏」措施，繼續出口術開期票嘅話，議員唔會收貨。
寶哥哥同金勞詹可以唔跟大隊，高床軟枕有覺好瞓，呢種特權其他人只能羨慕，事關寶哥哥出名「三點不露」，即係開會到下午三點就離開，有時會去酒店小休個零鐘，多年來已成慣例，試問高官狗仔隊點敢阻住佢呢？金勞詹鬧人唔使本，對住官員更加唔會客氣，如果有官員試圖攔截其去路，八方難以想像後果，一句到尾，政府無非欺善怕惡，唔通叫鬍鬚曾半夜三更打電話去西環求救，或者搵煲呔嘈醒寶哥哥咩！
mailto:[email protected]