陳奕迅（Eason）大前晚飛甩老婆徐濠縈，一拖三夜遊銅鑼灣，率領三女伴蒲VCD舖瘋狂掃碟。原來Eason是日本型男松山研一的fans，捧場購《爆粗BAND友》DVD，其後一行四人轉往何韻詩的大坑台私竇，齊齊煲碟開P。
陳奕迅大前晚在灣仔出席新片《金錢帝國》首映禮，太太徐濠縈未有陪伴左右，但Eason不愁寂寞，睇首映後繼續節目多多，一拖三女夜蒲銅鑼灣，消夜、買碟、開P直落，由Eason做老細，包起整夜消費。
全程畀錢請客
當晚Eason完成首映活動後，即與梁漢文太太Karen及兩名女伴齊到銅鑼灣消夜，嘆至凌晨近1時，由Eason畀錢請客，Karen食得唔好嘥，還手拎一袋外賣離開。一行四人繼而漫步街頭，心情大好的Eason如開籠雀，在街頭擠眉弄眼，大聲講大聲笑，其間他駐足報攤，睇完一輪又率三女到VCD舖掃貨。
現場見四人進店後即分頭瀏覽，Eason與同行一名跟他穿着同款運動褲的紅衣女伴特別好傾。約10分鐘後，四人各自揀啱心水影碟，Eason揀了日本型男松山研一主演的《爆粗BAND友》，另一同行穿豹紋短裙的女伴則買了幾隻演唱會DVD，同樣由Eason埋單。臨走時他還跟阿叔店員吹水，表情多多的Eason企到內八字，狀甚有趣，又與阿叔合照留念，非常親民。
赴何韻詩香閨
買完碟後，Eason一拖三搭的士再趕下場，向來大情大性的他也甚有男士風度，為女士開車門，自己則坐在司機旁座位，直奔老友何韻詩的大坑台寓所。的士抵達時，一貌似彭敬慈的男子已在大廈門外等候，Eason支付車費後一起上樓煲碟開P作樂。
採訪、攝影：娛樂突發組
