上期我重點推介巴黎聖日耳門，結果順利開「主勝」，諗住呢排旺爆嘅牛兄可以長贏，點知佢周二揀嘅奧沙辛拿又反輸畀馬拉加。我哋兩位繼續向正分進發，球季仲未完㗎。今期我玩英超，要愛華頓主場贏曼城，進取嘅貪夠贏兩球。
早排英足盃4強，愛華頓對住出副選嘅曼聯反而束手無策，好彩最後射贏12碼入決賽。「拖肥糖」士氣大增後，周三作客車路士表現大躍進，尤其防線直頭冇得彈；尤保復出後仍然有貨賣，巴尼斯「嘜」到安歷卡貼貼服服，如果前鋒祖奧生性啲，分分鐘喺史丹福橋贏埋都仲得。
曼城作客一條蟲
對車仔場波，悍將費蘭尼避戰冇份踢，必喺周六對曼城時復出；而沙根度卡斯迪路防守亦見硬淨，班波個攻守好平衡。主場穩陣一向係愛華頓嘅特點，聯賽連埋英足盃經已錄得6連勝，兼入夠17球。雖然愛華頓殺入英足盃決賽，聯賽又排緊第6，基本上來季歐洲賽資格冇走雞；之但係班波踢得咁順，對手曼城又唔識踢作客，個1.8倍主W仍然值捧。
曼城之前喺歐協盃出局，可專心打聯賽，而上場對住西布朗都贏得好險，防線都要失兩球。再睇曼城球星如雲，原來唔識作客，對上12場客績為3和9負，證明有羅賓奴唔係大晒。加上比拿美已收「咧」，胡禮仔又未出得，點計都冇得同大勇嘅「拖肥糖」踢，要主W同「主勝」啦。
為咗追分，配腳小注兩條冷門博大霧，要日聯山形山神主場和鹿島鹿角，以及格拉斯哥流浪喺蘇足盃和聖美倫。鹿角啱啱喺亞冠盃強陣搏完，周六又有小笠原滿男停賽；升班馬山神開季表現討好，「夫添」加主場有力迫和對手。至於格流有隊長巴利費格遜因傷收「咧」，又要專注聯賽同些路迪搏命，冷吼聖美倫頂得住90分鐘。文：畢傑
早飛王貼士
星期六21愛華頓vs曼城
首選：愛華頓勝（1.8）
次選：愛華頓勝[-1]（3.2）
冷選：愛華頓勝2:0（8）
早飛倉
主菜：星期六21愛華頓勝（1.8）@$2,000
渾水摸魚過關：星期六4山形山神和（3.45）x
星期六12格拉斯哥流浪和（4.25）x
星期六21愛華頓勝[-1]（3.2）3x4@$100
今日早餐價錢：-$2,400
上日賺蝕：-$2,500
早飛倉結餘：$82,625
規則：$100,000本錢，每日買早報最多動用$5,000，
最少$1,000，逢周二、五見報。
周末焦點
星期六47 曼聯vs熱刺
利物浦周中失分，令曼聯奪標路更好走，下周三要應付對阿仙奴的歐聯4強首回合，紅魔會否留力？熱刺首循環能迫和對手0:0，紅軍如要曼聯失分，得靠棄將羅比堅尼。
星期六57 華倫西亞vs巴塞隆拿
華倫要力保前4，巴塞則與皇馬的爭標路未完，兩者俱要全取3分。首循環華倫缺大衛施華到訪魯營，結果慘吞4蛋，此子能否繼前季後，再於主場射破巴塞大門？
星期日56 西維爾vs皇家馬德里
西維爾的比斯桑球場專恰巴塞與皇馬，近季甚少在這裏落敗，勢當攔路虎；皇馬近期防線得人驚，中堅比比上仗蓄意踢人，將要面臨停賽數場的處分，更有洛賓等人缺陣。