呢幾年中央官員來港，煲呔與特區政府必定大鑼大鼓歡迎，以免待慢中南海貴客，不過八方聽聞，原來噚日有中央高層神神秘秘嚟過香港，仲私下同煲呔見過面，呢個人就係國務委員、中共中央政治局委員劉延東。
劉大姐以往做統戰部長嘅時候，喺香港有唔少朋友，不過佢今次駕臨，據聞冇正式會見任何人，亦冇任何官方活動，自然令唔少政圈中人猜測，劉大姐係咪有中央「密令」傳達煲呔，所以咁低調？八方向知情人士打聽，原來劉大姐今次只係過境香港，即日離開，冇安排官式活動，但過門都係客，煲呔都有喺禮賓府整圍家宴接待劉大姐，席間風花雪月，無下達中央「密令」，大家唔好亂估！