我哋日日同大家介紹靚車，今日換換話題，睇吓馬仔嘅靚車。班馬仔隻隻身嬌肉貴，而且仲係唔少人嘅米飯班主，當然有專屬交通工具同專人服侍，威過你同我。早前我就直擊咗嚟香港參加星期日女皇盃嘅一眾貴價名駒由機場到馬場嘅星級行程，原來淨係座駕都有幾種選擇。
記者：梁美甜
攝影：王文忠
模特兒：Vanessa
最大型「坐」足9隻馬
呢部係運馬車中嘅最大車型，共有10部，車前半部多為平治拖頭，後面就係馬仔座位，唔係，係企位至真！呢啲馬廂嚟自英國，經過改裝。車廂約長40呎，分三個倉，每個倉可以載3匹馬，即是成部車可以載9匹馬。係就係同其他馬仔逼，不過有冷氣，保持攝氏21度左右，同馬房環境相若，馬伕亦會坐喺隔籬沿途照顧！有時仲有埋工程車、獸醫車、後勤指揮車等隨行㖭。行車亦有時速限制，市區40km/h，高速公路就係60-65km/h左右，司機叔叔唔會突然加速減速，轉彎時仲會提早扭軚以確保行車穩定。講真，有咩損傷影響出賽表現令廣大馬迷失望就唔好啦！
港產中車保護十足
呢部中型運馬車係舊年先開始加入運馬車行列，拖頭係香港訂做，車廂有兩個倉，每次可以運載6匹馬。中型車其實同大型車一樣，都裝有感應器同埋電子記錄儀，監測行車時車速以及GForce，你知喇，部車行得太快，掟得太急容乜易「馬有失蹄」，所以個個馬廂除了避震之外，仲會喺倉內加上防撞軟墊、保護馬腳嘅防踢橡膠板等。
私家倉啱受傷馬仔
三款運馬車中最細，前面由LandRoverDiscovery拉動，後面就係由英國訂來嘅獨立倉，每次只係運載一匹馬。呢部車優點係地台特低，用來運受傷嘅馬仔就最啱，不過就算只係個人喜好，主人要求獨立倉運馬仔都一樣得。
女皇親自頒
呢個周日會舉行女皇盃及冠軍一哩賽。女皇盃即2,000米國際一級賽，舊稱「英女皇伊利沙伯二世盃」，75年5月5日首次舉行，以慶祝英女皇伊利沙伯二世及皇夫菲臘親王嚟香港作皇家訪問。當時確係由英女皇親自頒獎，之後年年舉行一次，95年開始開放成為國際賽事，容許海外賽駒參戰，嚟緊4月26日嘅愛彼錶女皇盃獎金更可觀，高達一千四百萬元，而冠軍一哩賽嘅獎金亦有一千二百萬！
