下雨天，他離開了。人稱阿叔的著名足球評述員林尚義，昨日在律敦治醫院逝世，享年74歲。有重炮稱號、縱橫球壇近半世紀的阿叔，在演藝圈同樣備受尊崇，與他合作過的演員無不為他的突然離世感到惋惜，尤其他的敬業樂業，以及自成一派的搞笑演技，更是令人難忘。
人稱阿叔的林尚義昨日逝世，享年74歲。阿叔性格風趣，生前不但是出色足球員及評述員，還涉足演藝界，參演過近50部電影，演繹的鬼馬小人物令人笑破肚皮，當中令人印象最深刻的角色，非電影《古惑仔》系列中扮演的牧師莫屬。
天華：佢好有自己style
自幼愛聽阿叔講波的Laughing哥謝天華，曾與阿叔合作《古惑仔》系列，他指阿叔的牧師造型神似，配上其獨特演技更是天衣無縫。天華昨日在電話中說：「我好記得阿叔講對白好有自己style，佢講到好似講波咁，但出嚟嘅效果又唔錯，好搞笑。」又指阿叔在片場中很被動，甚少主動跟其他演員聊天，但當天華主動跟阿叔傾偈，他都十分友善。
天華續說：「阿叔會講吓波經，又講吓古，總之佢一傾就好多嘢講，講嘢好幽默。」對於阿叔離世，天華大感意外，他說：「不過我都聽過佢近年身體差咗，但去得咁突然，聽到都好唔開心。」
同樣與阿叔因《古惑仔》結緣的鄭伊健，昨日在電話中心情沉重地說：「聽到呢個消息個腦一片空白，諗番好多同佢合作過嘅片段，佢喺我眼中係一個好爽直嘅前輩。」他又表示稍後會聯絡劉偉強，希望為阿叔家人出一分力。同片演員林曉峰昨獲悉阿叔死訊後，更一度驚愕至無法言語，其後他說：「個腦一片空白，反應唔到，我細細個已經聽阿叔講波，佢真係一個legend。」
好姨：老頑童直腸直肚
《古》片導演劉偉強昨日謂當年看中阿叔扮牧師，主要是貪新鮮，得知阿叔去世的消息，他說：「人就係咁化學，聽到呢個消息真係幾意外，阿叔為人係好風趣幽默，當然佢唔係一個專業演員，所以當年我搵佢喺《古惑仔》做牧師，係希望可以畀觀眾一個新鮮感。其實阿叔都幾勤力，佢初初做戲未習慣會經常NG，為咗令佢演得自然啲，我就同佢講，做戲咪當講波咁就得，唔使驚。」阿叔雖然年紀大，但其好學精神令劉偉強十分欣賞，劉偉強說：「佢好努力，不斷排練，做到好為止，呢啲工作態度好值得年輕演員學習。」
薛家燕（好姨）於97年與阿叔合演《黑玫瑰義結金蘭》扮情侶，她昨日得知阿叔死訊後十分難過，在電話慨嘆說：「好愕然，前年我曾經打電話邀請阿叔嚟我個電台節目接受訪問，佢退咗休都想多啲休息，結果就推咗。」對於阿叔這位「螢幕情侶」，好姨大讚他是好拍檔，因為他永遠會帶給大家很多笑料，好姨說：「阿叔有時幾蝦碌，佢會好堅持自己嘅演繹方法，所以演嚟反而同大家擦出好多火花，例如有幕調情戲，導演要阿叔情深款款餵湯畀我飲，點知佢依然好cool咁。」她又形容阿叔是老頑童，為人直腸直肚。
克勤：好愕然好惋惜
另一方面，與阿叔一同効力無綫體育組多年的韓毓霞昨日說：「伍晃榮離開咗一年，家阿叔又走埋。阿叔係電台講波出身，所以佢講波好生動好傳神，不過阿叔唔鍾意social，平時好少同大家坐埋食飯，通常佢鍾意坐開食，有時就會返屋企等埋老婆一齊食。佢好錫佢太太，但自從太太過身之後，阿叔變得比較孤獨。」
先後與阿叔合作主持多屆世界盃的林敏驄和李克勤，均表示不捨阿叔離去，克勤昨透過助手回覆說：「好愕然，好惋惜。」林敏驄則後悔雖然有阿叔手機號碼，但一直未有聯絡，他說：「真係好遺憾，我諗以後要珍惜眼前人，阿叔講波經驗同資歷都深，我好享受過去同佢合作，可惜下一屆再冇機會。」
採訪：林妃
娛樂資料庫：古惑牧師一戰成名
「放下屠刀，立地信耶穌啦。」阿叔林尚義在《古惑仔》系列中飾演牧師，不時向陳小春及林曉峰等小混混傳教，雖然出鏡不多，但在電影中發揮着舉足輕重的作用，自此，牧師也成為他的標記。其實阿叔生前熱愛足球之餘，對演戲也非常熱衷，參演過近50部電影，首部作品是92年由周星馳主演的《逃學威龍II》，最後一部則是04年的《男上女下》。
阿叔拍戲如做人一樣嚴肅認真，雖然他多以客串形式拍攝，但總以最專業的態度去演繹每個角色，就算被醜化也不介懷，如在《超時空要愛》中便要反串演出，令觀眾留下深刻印象。
部份電影作品
1992年：《逃學威龍II》
1996年：《港督最後一個保鏢》
1996年：《古惑仔之人在江湖》
1996年：《古惑仔2之猛龍過江》
1996年：《古惑仔3之隻手遮天》
1996年：《衝鋒隊之怒火街頭》
1996年：《旺角揸Fit人》
1997年：《黑玫瑰義結金蘭》
1997年：《超級無敵追女仔II之狗仔雄心》
1997年：《愛上百分百英雄》
1997年：《迴轉壽屍》
1998年：《超時空要愛》
1999年：《黑馬王子》
1999年：《賭俠1999》
2001年：《買凶拍人》
2003年：《龍咁威2003》
2004年：《男上女下》
資料來源：《蘋果》資料室
踢入娛樂圈
