杜琪峯前日54歲生日，佢就約埋一班圈中好友喺西貢某海鮮酒家舉行生日會，好多杜sir嘅電視台同電影圈死黨，好似出爐影帝張家輝同老婆關詠荷、黃秋生、劉青雲、吳鎮宇同汪明荃都現身祝賀壽星公，杜sir仲喺飯局上高歌助興，令眾人拍爛手掌。
呼籲成龍講少句
杜sir接受訪問時講到成龍嘅奴才論時，佢話：「我唔知佢講乜，只知講得唔係咁好，佢講嘢冇傷害人就OK，不過都係講少啲，佢唔需要講呢啲嚟代表自己高低。」至於無綫刪減金像獎片段被轟，杜sir明寸無綫話：「有心就做好佢，冇心就唔好做，呢度有冇TVB人呀？死啦，實cut。」
阿姐人到禮不到
有份到場嘅林家棟稍後會開工拍《葉問》續集，問到佢係咪會再做漢奸？佢笑笑口話：「戰後冇漢奸，只有奴才。」可能佢發覺辣到成龍嘅一番奴才言論，林家棟即時收口。至於曾經同杜sir傳不和嘅阿姐，問到送咩禮物畀杜sir時，佢竟然話：「吓？乜事要送禮物，我唔知喎，只係知嚟食飯。」
問到張家輝嘅囡囡見到佢個影帝獎座時有乜嘢反應？家輝話：「摸吓囉，同之前電影評論學會個男主角獎放埋一齊，一個係男公仔，另一個係女公仔，希望佢哋可以生多啲仔女畀我。」記者笑問係咪想生BB慶祝，家輝話只係想再攞獎，又話唔敢畀獎座囡囡玩，怕佢整跌整傷自己。
