下星期代表旅發局去台灣，宣傳香港旅遊業嘅旅發局主席田少，趁未起程爭取時間同太太拍拖，前晚7點半左右雙雙現身中環IFC戲院，八方見到田少捧住一大桶爆谷密密食，自得其樂成個細路咁，田太則懶得理為食老公，自顧自拎住部手機打SMS。
未夠鐘入場，兩公婆喺IFC個mall左行右行，路經ZARA時，田少企喺櫥窗前指指點點，不過田太對男裝似乎興趣不大，得個睇字冇乜反應，可能冇乜心水，最終兩人都只係windowshopping，冇幫襯。根據戲院放映時間表，田少夫婦應該係睇卡通片《天煞撞正怪怪獸》，做咗阿爺阿嫲都童心未泯，真係估佢哋唔到。