2009年春夏之交，邪教成功滲透殖民地大學校園，教主大肆宣講妖道，企圖迷惑眾生，知識分子的光環驟明驟暗；隔岸馬料水的小頭目不忍同道落入魔掌，決定燃起烽火，誓要喚醒那一場革命發生時尚未形成的生命。
范長豐，中大學生，1989年6月，他在母親的腹中滿6個月。20年來，六四事件恍如校園鬼故事，家人不說、教科書不說，他每次提起，就被同伴視作異類、憤青，樂觀的他最大心願是燃起每個人心裏的燭光。 記者：張嘉雯
民運發生時，范媽媽心情非常激動，想上街聲援，卻因為天氣惡劣，加上腹大便便，被迫留在家中，「阿媽當時好不忿，日日鎖自己喺房聽《血染的風采》，所以形成我係咁性格。」
9、10歲的范長豐跟其他細路一樣，喜歡看漫畫，但看的是尊子漫畫，「入面成日提到『六四』呢兩個字，但係書又無講喎，覺得好神秘。」好奇的他於是上網搜尋，謎團才終於解開。
范長豐：有平反的一天
升上中學後，范長豐的中學老師在課上播放當年的錄影新聞片段，他自己找相關的書籍、小冊子閱讀，又進一步上網看資料。15歲時，第一次參與燭光集會，「覺得好好奇又好奇怪，文革都會講，點解呢件事唔講呢？民間會講，學者會討論，但政府都冇出過聲。」
正正是官方絕口不提，成為他殷切要了解真相的動力，「細個嗰時覺得政府好有權力、好有權威，好似爸爸媽媽咁好，但原來政府好似普通人一樣，都有犯錯嘅時候，有死口唔認嘅時候。」
跟他同齡的同學不多不少聽說過六四，只是不知詳情，「叫佢哋去六四集會，三、四個會去，五、六個唔去，覺得有其他嘢，或者考試呀咁，緊要過六四，佢哋會覺得好離身，政治唔關我事，唔會擺入自己agenda。」
試過平日活動，穿着寫上「人民不會忘記」的T恤，結果被同學取笑，「佢哋唔會笑我無謂，不過會覺得我係憤青，離遠見到我就嗌『大俠』或者『大哥』，又會講笑話『你做呢啲我哋好支持，咁你做埋我哋嗰份喇，成個社會靠你㗎喇！』難聽啲講，就係食花生等睇戲。」
兒子擔任中大學生會外務副會長，當年曾經激動的媽媽開始擔心，「佢話唔想我做劉山青喎，都係愛子心切啦，唔好話搞到家破人亡、妻離子散。」
雖然被人取笑，但范長豐樂觀，不認為自己是小眾，「廿年前跑馬地塞滿人唔係假㗎，佢哋只不過係將自己嘅心聲收起嚟，我哋就要去將呢啲心挖番出嚟；或者係個心冷卻咗，我哋要令佢再熱番。」
他認為不少人被神七升空的盛況或者奧運美好的景象蒙蔽，只要提醒他們，六四會有平反的一天，「我希望政府可以正視，我唔想自己國家咁樣。」
Ivy：點解六四係禁忌
同是1989年出生的Ivy，是中大一年級生，中學時修讀文科，跟范長豐一樣，對六四這個謎團感到很好奇，「覺得好奇怪囉，點解六四係禁忌，教科書又唔講，好似歷史上面一個空白點咁，家人又支吾以對，係老師會提吓，佢哋反應比較大，令我覺得更加好奇，更加想知，就上網搵吓，同同學傾吓。」
她很幸運，在同學中找到同道中人，中六那年跟同學自發在小息時間為六四死難者默哀，今年更會首次參加六四集會，「我覺得六四係一件好近嘅事，好有象徵意義，係象徵住一個國家唔民主，同埋新聞唔開放。」
升上大學後，她發現身邊同學都覺得政治並非值得關注的議題，當初選讀政治與行政學，家人不喜歡，也不支持她參與六四活動，「佢哋話：『你去囉，不過唔好搞事，我唔想喺電視度見到你，有啲嘢過咗去就過咗去。』不過我都會去，同埋我會好好裝備自己，如果唔知件事，好難同人傾。」