人浮於事，勞工處成日人頭湧湧，有人向八方報料，指勞工處求職網站近日有份為成龍度身訂做「筍工」，呢份工係食肆洗碗工，工作時間朝7至凌晨1點，直踩18個鐘頭，一個月有六日假期，月薪4,000蚊，即係時薪唔夠10蚊，打呢份工形同奴才，怕且得成龍肯做。
呢間請「奴工」嘅食肆係一間位於銅鑼灣浣沙街嘅樓上火鍋店，八方致電詢問請到人未，負責人林先生話未有人見工，唔係因為佢哋太刻薄，而係勞工處靠害，佢話提供資料畀勞工處，工作時間係晚7至凌晨1點，即係日做六小時，時薪廿幾蚊，點知勞工處卻寫錯朝早7點開工，梗係冇人見工啦。
勞工處知道出錯後即時更正，強調係忙中有錯，向林生同求職者saysorry，林生好大方，唔會追究。