教區主教陳日君樞機上個禮拜正式退休，當日一班教區職員幫佢搞咗個farewellparty，送咗件祖雲達斯球衣畀佢做禮物，上面印咗樞機個姓ZEN，同埋1號，「禮物先生」私底下同八方講，樞機係祖記fans，因為佢喺意大利都靈讀咗九年書，仲喺嗰度升神父，所以對祖記感情特別深，呢件波衫啱晒佢心水。
以前踢波做後衞
樞機以前踢波時多數做後衞，因為唔使太多技術，純粹靠毅力，同佢做人原則一樣，所以認為自己最適合做呢個位。現代足球要求球員有全面技術，一味做前鋒衝都未必有用，後衞助攻亦可以入波，樞機近年喺社會事務上行得咁前，佢應該深諳足球戰術。
八方聽聞當日派對有好多美食，成日話要減肥嘅樞機開懷大嚼，佢話自己好耐冇做運動，退休後有多啲時間行山，唔使辛苦戒口。樞機退休後除咗會專注中國教會事務外，原來仲有「大計」，就係考慮下廚為教會籌款，因為佢喺《樞機廚房》教煮紅燒肉好受歡迎。