「古巨基EYEFEVER演唱會2009」昨晚在紅館開鑼，近日傳他和金牌續約鬧不快，昨晚開騷前基仔和金牌揸弗人黃柏高（Paco）一同拜神，二人雖有交流又面帶笑容，但卻一句起兩句止，與平日有傾有講的態度大相逕庭。
古巨基昨晚在紅館舉行「EYEFEVER演唱會2009」，近日他備受續約一事困擾，因基仔早於2月14號已約滿金牌大風，有傳他不停採取拖字訣不肯和公司續約，但私下卻跟其他公司接觸，結果觸怒老闆鄭東漢決定不再和基仔傾續約。
周慧敏入場哄動
昨晚基仔開騷前如常到後台拜神，他戴上cap帽、黑超，現場約有數十名fans等候，她們大叫：「Goodshow！」基仔聽到後和她們打招呼。而基仔和金牌揸弗人Paco一同拜神時雖然有交流，大家都有交談及面帶笑容，但只是一句起兩句止，表現生疏，與平日親密態度截然不同。
前往捧基仔場的圈中人包括羅守耀、樂易玲、何麗全夫婦和楊穎（Angelababy）等，當周慧敏和谷祖琳入座時全場起哄，周慧敏不時露出笑容和向觀眾揮手。
腳震震搞爛gag
甫開場基仔唱出《錢錢錢錢》，他站在巨型玻璃球從天而降，舞台以白色為主，投射出不少圖案。唱完後基仔又發揮爛gag王本色說：「我今次第三次喺紅館開演唱會，三面台，兩隻眼唔夠睇，要埋第三隻眼，唔好怕醜，我係話腳眼，好爛呀。」基仔又表示首次在紅館頂下來，坦言有點害怕和腳震。
而人氣十足的Laughing哥謝天華據知會擔任昨晚嘉賓，而場外有不少紀念品如T恤、cap帽和精品袋出售，反應不錯。
採訪：李珮洳
攝影：葉君海
