【本報訊】電盈私有化上訴庭聆訊以「3比0」裁定敗訴，電盈小股東大聯盟十數名成員昨日舉行祝捷記者會，更互贈利是及紅蘋果，寓意驅走厄運。
輸了官司，電盈卻派發巨額股息，動機惹來無限揣測。小股東大聯盟召集人梁國強形容：「我自從買咗呢隻股票，就上咗一條賊船，船長最初好正人君子講，全心全力做好盤生意，點知係假面具！」他表示，電盈派息後，現金只剩數億元，「試問咁大一間電訊公司，現金流咁少，未來處境都好堪虞，何況PE廿幾倍，點回本。」
普遍歡迎派息
外界質疑電盈或因「手緊」要供股，小股東權益遭攤薄的話，一年後私有化或更易過關。梁國強稱：「係咪供股我唔知，始終係不務正業，我心情悲喜參半。」他昨日沒有因股價下跌而增持，「但肯定唔沽，睇吓將來佢會唔會痛改前非。佢上訴終審，我哋亦奉陪到底，公理企喺我哋正義呢邊！」
「歌王」黃得流再嚴斥：「基本佢唔會掏空公司，除非好似賭仔洗腳唔抹腳，亂咁fing，其實佢身邊啲人都係損友，搵到盤滿缽滿係開心，但信用同人格都輸埋。」
或許對電盈多次賣盤已經習慣，在場小股東普遍歡迎派息決定，庭上灑淚的葉女士稱：「有息派點解唔攞，都估到股價除息後會跌，要供股冇所謂，反正攤薄唔到幾多。」
「憶父」的黃玉群也表示：「派息開心㗎，我收兩萬蚊息。供股？掏空？係有咁嘅味道，但冇辦法，佢係有咁嘅權力，驚都驚唔嚟。」副召集人譚玉娟更稱，派巨息有希望，她昨早更於低位增持。
投資逾300萬元的前資深經紀股東陳鵬程分析稱：「派息後，公司現金流並唔係咁大鑊，電盈資本開支的最大隱憂，只來自發展中的3G業務，但物業即將入賬，09年盤數應會見好。賣盤畀大陸，可能先係私有化真正動機。」