調查雷曼迷債小組由保皇派把持，成班人同聲同氣，應該冇乜異見聲音，點知前日籠裏雞作反，鼠王芬不滿「專業會議」盟友、小組主席何鍾泰會上阻止佢發言，又批評佢言不及義，鼠王芬一怒之下離場抗議，搞出茶杯裏的內訌。
鼠王芬噚日話，呢次係佢喺立法會處女walkout，第一次就咁畀咗何鍾泰，講起仍然忿忿不平，佢話好多議員發言時都係廢噏，質疑何鍾泰對人不對事，見佢係自己友就蝦佢，對住聲大夾惡嘅民主派反而粒聲唔出，擺明欺善怕惡！何鍾泰就強調自己主持會議好公道，對得住天地良心，「冇對梁美芬做過乜嘢。」堅持唔會認低威。