過去半年，我在4個國家摘過大大話話5次士多啤梨，恕我做不出電視台姐仔那種「好大粒呀，好甜呀，好好味呀！」等表情來。別問我那個國家出品最好味，食生果啫，有需要細緻到這個程度嗎？去過不少果園，未必個個記得，但像我剛去過岡山這個，雖不是我吃過最甜的，但它有些細眉細眼位，就是會夭心夭肺叫你特別記得。例如，格局。十個士多啤梨園，八個真係除士多啤梨以外乜都冇，但這個感覺特別窩心，主人在果園旁建了有童話感的屋仔cafe、鞦韆，以及廁所一格！Cafe牆上貼滿客人狗仔相，張張都是幸福回憶，令你覺得主人真心想跟人（及狗）分享士多啤梨園，沒有把它當成純粹的收入來源。
其次，主人真的很愛士多啤梨。摘士多啤梨是一項很自助的活動，但來這裏，會被要求排排企聽講解，過程中主人個樣仲要幾惡：「你哋摘時唔准粗魯，正確手勢係屈一屈個椗，然後轉兩轉！如果太大力，以後啲士多啤梨會生得唔靚！」臨走，拿卡片，唉，連卡片都有士多啤梨香味！感染之下，現在本人張張卡片都有士多啤梨香味，雖然我間公司名叫做《蘋果》……
記者、攝影：劉嘉蕙
鳴謝：一田百貨
NakayamaStrawberryGarden
地址：日本岡山縣岡山市菅野3980