阿蘇副局長使工人去入境處show卡片撻朵醜聞手尾長，佢自己亦有後遺症，患上「派卡片恐懼症」，立法會噚日辯論本年度預算案，民主派動議取消副局、政助薪金撥款，因為呢班政治新貴好廢，要納稅人供養佢哋太寃枉，蘇錦樑成為眾矢之的，社民連長毛教精阿蘇，話自己落區派卡片，會雙手遞畀街坊兼講句多多指教，學似阿蘇咁以為一卡通行，遲早撞板啦。
陳偉業則話阿蘇上任一段日子，自己有眼不識泰山，好似仲未收過蘇副局長卡片，噚日當眾要求佢惠賜一張，日後有需要時可以show出嚟一用，點知阿蘇家聽到派卡片就驚，惜卡如金唔再貿然派片，激到陳偉業紮紮跳，大鬧阿蘇忽然變成縮頭龜。
議員寸副局要好好管教
議員鬧人絕不留情，何秀蘭指高官月入十幾萬，竟然連派卡片都唔識，真係浪費公帑，佢又話成龍話香港太亂冇錯，要管都啱，亂在官員亂派卡片，高官冇規冇矩，應該要管；坐喺議事廳做人肉沙包嘅阿蘇俾議員蹂躪不能還擊，表情尷尬全程黑面。
蘇錦樑唔派卡片都冇人識，另一個財經事務及庫務局副局長梁鳳儀就唔派片都大把人相認，原來好多人誤以為佢係財經女強人、小說家兼議員黃宜弘太太，因為兩人同名同姓，佢去內地公幹時，好多人要求佢喺小說上簽名，初時佢會解釋，後來費事花唇舌，照簽就算，最多簽完名先話係一場誤會。
何秀蘭寸蘇錦樑係奴才，應該要好好管教，立法會演藝界代表霍震霆可能習慣被人管束，所以對成龍言論冇反應，只係話佢講咗好多嘢，至於成龍講得啱唔啱，佢堅持唔表態。反而老董有開聲，佢喺紐約大學中國論壇講演「中、美關係展望」時，被問到對成龍講法有乜意見，老董表明唔贊成呢番話，又話自己認識成龍，對方為人風趣而且可愛，至於點解成龍咁講，佢就唔清楚。
成龍認為台灣、香港有選舉就亂，老董又點睇民主太亂呢個問題？佢認為西方民主國家實行多黨政治，社會好容易因為政黨輪替而產生糾紛同爭論，好彩中國至今未達這種境界。
mailto:[email protected]