如何為心愛嘅人煮飯、令佢滿足係高深學問，日日如是最怕冇新意，「分子料理之父」HerveThis話烹飪係藝術，想煮嘢好食，首先要知道自己煮緊啲乜。
用愛去煮自然好味
This先生噚日主持一個講座，出席者多數係專業大廚，佢以雞蛋為例，指蛋白、蛋黃都有好多煮法，多啲認識一隻蛋，係最簡單嘅分子美食入門，攪拌蛋白加入空氣，蛋白變成白色，已經可以整好多菜式；淨係用蛋黃，亦有好多煮法，但要識得取出蛋黃，原來好多人都唔知蛋黃輕過蛋白，好多大廚聽佢講完，恍然大悟。
美食應該色、香、味俱全，煮家常菜唔同餐廳大廚，成日食單調住家菜好悶，This強調烹飪除咗講究技巧，最重要嘅材料係「愛」，少少唔拘，多多無妨，為心愛嘅人奉上食物時，講一句ILoveYou，包保未食就甜到漏。
自稱係科學家唔係廚師嘅This，心願係將烹飪科學化，為大眾提供更多創意同選擇，不過佢話唔知道世上邊種食物最美味，用心嘗試，用愛去煮，自然好味。