每年一度，到學校揀教科書季節，報紙上例牌出現教科書加價新聞，教育局例牌呼籲唔好加價，消委會例牌抗議，傳媒評論例牌鬧一輪，教科書出版商例牌唔出聲，受罵之餘加價如儀，學生家長照樣買書。
今年有少少唔同，似乎有啲出版商聲音噃。呢日遇到出版F，佢係電子出版專家，雖然冇直接睇教科書出版，但因為在教科書出版社公司工作，對教科書出版流程十分熟悉。呢日同佢傾起，佢話坊間有啲議題，多數係誤解，可以講一講。
（一）點解每年修改課本出新版書？出版F話冇課程改動就唔會改版，教育局改課程係因，出版商改版係果，不能因果調轉，教育局操決定課程內容之大權，出版商只能照跟。此外，教育局規定，每科改動，三年一次，唔係年年改，但因為每年都有一兩科改變課程，所以每年都有改版書。
（二）點解新書用粉紙，搞七彩精印？出版F話香港學生喜歡靚書（市場需求也），唔能夠走番轉頭用印度教科書咁嘅款，否則賣唔去。況且以成本嚟講，教科書之最大成本在編寫與事先研究，印刷成本佔總成本比例不算高，粉紙、書紙之供應價亦相差不遠。
（三）點解要出咁多教材、光碟，慳番得唔得？出版F話：「你估我哋唔想慳咩，但有兩個大理由唔得！」呢兩個大理由就係：（甲）老師工作太多太忙，改簿之外要編notes或輔助教材，因此對教科書要求多多，諗得出嘅需要都要出版商提供！（乙）特區政府老早宣佈電子教學為必需，撥款畀學校買電腦及軟件，催谷學校利用電腦教書，如果一套教科書不附帶光碟，學校用乜嘢教材？做齊呢兩樣，成本自然推高。
（四）到酒店辦教科書展銷會。出版F嘆曰：「此乃真正行外人之言，表面上在酒店辦展銷會係嘥錢，但我哋可以一次過請大量學校到場向佢哋介紹。如果我哋逐間學校去，每次運送十科八科嘅書連同教材，加埋編輯與營銷人員，你估要幾多成本與時間？如果係咁，啲中小型出版商會極度不利！只會益晒大公司。」學校選擇邊一間出版社嘅課本，有如選美，要求多多，書價只係三四十個考慮因素之中一個，而且學校大條理由：質素第一，滿足教學需求第一。既然如此，學校揀書唔多睇書價，家長付鈔，學生畀埋老師嗰份，理所當然也。