大姨媽我係不折不扣嘅名牌奴隸，乜名牌都愛，名牌車當然都揸唔少，有個世姪唔知係咪忍受唔到我呢股氣燄，走嚟挑戰，問我甚麼「線性」、甚麼「出產年份」，可唔可以改裝升級云云。得罪講句，我鍾意揸唔代表我係大偈，對住副偈曉整曉改咁叻叻，唔通部車咪錶極速270km/h我就踩到盡先過癮？每部車製造之前自有其設計元素，尤其係所謂嘅超級跑車，唔少都有獨一無二嘅元素，我只會享受新車落地帶嚟嘅駕駛感覺！
唔通買車唔知部車性能咩，極速幾多、扭力幾多睇一眼就唔記得啦！感受梗係要自己玩盡部車去領略啦，只係唔會每部車都踩到盡、踩爆錶囉！香港有時速限制㗎，喺香港，一般路面都只係行50至70km/h，我清楚自己係用家唔係汽車維修師傅！或者應該要鬧我太幸福，老公任得我任性咁對車貪新忘舊囉！
文：大姨媽