鮑起靜日前榮登金像影后，幫積弱多年嘅亞視爭光，亞視即刻不斷安排佢宣傳，就嚟60歲嘅鮑姐，前晚喺亞視搞嘅慶功宴時終於頂唔順，狂嘔送院，不過佢噚晚仲撐住返亞視總台錄影星期日（26日）晚播出嘅《金像影后鮑起靜》。
老公大嗌心痛
鮑姐近排除咗錄影節目《開心大發現2009》，後日又要返廣州拍攝《芳草尋源》，屋企人都肉赤鮑姐冇時間休息。老公方平唔係幾贊成鮑姐噚日就開工，方平喺電話話：「我心痛佢咁操勞，噚晚都鬧佢咪咁辛苦，健康緊要。阿Ann（許鞍華）遲啲唔喺香港，太太唔好意思改期。」鮑姐噚晚喺養和睇完醫生就堅持返屋企休息，方中信同莫可欣好有心，仲漏夜探訪。
噚晚方平做柴可夫護送鮑姐入廠，經過休息，鮑姐精神好番啲，佢見到記者猛話：「多謝大家，唔好意思，搞到大家，食咗藥好番好多。」鮑姐表示今日要為電影拍煞科戲，許鞍華稍後又要去意大利，大家好難就期，所以至唔可以取消，愛妻情切嘅方平就笑言自己最辛苦。
許鞍華都好關心鮑姐情況，有指鮑姐金像獎連踩多場慶功以致太攰，佢笑住話：「帶佢蒲多啲。」
高層致電慰問
此外，亞視高層葉家寶噚日接受商台節目電話訪問，佢話都有打電話慰問鮑姐，佢話噚日取消咗鮑姐《開心大發現2009》嘅錄影。佢又話亞視會爭取出年播金像獎，仲揶揄無綫剪咗鮑姐多謝亞視說話係友台特別風格，佢話：「好多人有迴響，俾人知道亞視有咁優秀演員。」