上市公司股東大會，通常都會有茶水點心招呼小股東，感謝佢哋支持，俗語話「雞髀打人牙骱軟」，等小股東鬧管理層都可能鬆手啲。不過金融海嘯下，攞緊華府救濟嘅花旗連呢樣嘢都要慳。
前日，花旗喺紐約希爾頓酒店舉行股東會，有1500個小股東出席，但呢個長達6粒幾鐘嘅股東會，不但冇準備茶點，仲連水都冇杯，點會唔辣㷫班小股東。難怪主席帕森斯（RichardParsons）同總裁潘迪特（VikramPandit）成為眾矢之的，俾班小股東鬧到狗血淋頭。
逾50保安維持秩序
話時話，呢次花旗股東會如臨大敵，請咗50幾個「食蕉」維持秩序，仲學埋機場咁，設關卡做足嚴密保安，唔通班董事驚小股東乘機搞事？不過家陣示威興掟鞋，防不勝防。