港股繼續調整，恒指萬五大關不保，收市14878，再跌407點。內地A股急挫，中資股沽壓較大，H指收8721，大跌317點，跌幅3.5%。
恒指已跌穿10日線（15265點），而20日線已上升到14651水平，係重要支持所在，但假跌穿後才完成調整的可能性亦不容抹煞。上一個升浪，恒指由11345升到15977，共上升4632點，以調整升幅的0.382計，恒指有機會回落到14200水平。
市勢雖急挫，但上升正股仍超過300隻，噚日開到水泥同濠賭股，50大上升榜中，水泥股有3隻，濠賭股更有8隻。
水泥股除安徽海螺（914）外，全面上升，升幅最勁係中材股份（1893），大升13.4%；其次係上聯水泥（1060），升13.1%；另外一隻少為人知的昌興國際（803），亦跟大圍而上，有8.6%進賬。
昌興主要從事水泥熟料及其他建築材料貿易，現時「晒士」細細粒，市值只6億多，但公司正進行大動作，大股東安排將炙手可熱、目前在英國上市的水泥業務注入，成事後，成間公司會脫胎換骨，變身大型水泥企業。
大股東注資快落實
昌興主席黃炳均（持有39%權益）同時亦持有英國上市公司ProsperityMineralsHoldingsLtd.（昌興礦業）53%權益，已簽署意向書注入昌興，並由東英亞洲和美林為聯合安排人，好快可以落實。
昌礦「晒士」好大，現時在內地有6間水泥廠，包括英德龍山（100%）、英德海螺（25%）、安徽巢東（33.06%）、廣州市嘉華南方（40%）、雲南昆鋼嘉華（30%），以及保山昆鋼嘉華（30%）等。另外，有3間新廠籌建中，包括遼寧煙塔市（55%）、重慶市（55%），以及貴州省貴陽市（55%），9間廠總產能達3000萬噸，每年利潤達數億元。
昌興係一隻栽培中、可塑性甚高的股票，未來股價好大機會以倍計上升，過去兩個月在0.25元水平整固，近日開始發力，噚日高收0.315元，升勢再起，初步上升目標係0.4元，在注資落實後，有力再上。
郭兆誠