新片《金錢帝國》前晚舉行首映禮，孟瑤和劉洋兩位晶女郎以黑白性感雙煞造型夾擊徐子珊，就連陳奕迅（Eason）都被兩位性感美女吸引，與她們密密斟，更把玩孟瑤的古董手袋，冷落在旁的徐子珊，令她十分無癮。
由王晶執導、陳奕迅、黃秋生、徐子珊、孟瑤、劉洋和方力申等主演的新片《金錢帝國》前晚在灣仔會展舉行首映禮，出爐影帝張家輝也來撐老友秋生場，秋生更罕有地帶同12歲的大仔出現，並大讚兒子很乖、思想成熟及不囂張，另一主角梁家輝則缺席。
「劉洋身形好靚」
早前秋生曾指Eason似八婆一樣亂爆契仔陳冠希的事後，傳出兩人不和，不過他們前晚在首映禮時有傾有講，表現老友，似已冰釋前嫌。他們更互笠高帽，Eason大讚秋生好演技，不用埋位時也會留在現場觀摩其演技，不過秋生就踢爆Eason只是為了孟瑤。
事實上，Eason前晚明顯被性感打扮的孟瑤和劉洋所吸引，以性感黑白雙煞造型示人的兩位晶女郎大搶風頭，同場的徐子珊即被比下去，Eason更只顧和孟瑤和劉洋傾偈，還搞笑地把玩孟瑤的古董手袋，當徐子珊冇到。
對於被兩位性感美女吸引，Eason就笑說：「同拍戲見到時差唔多，女士有好身材，係值得驕傲，劉洋身形好靚，但事實上佢好男仔頭。」
秋生樂演前傳
Eason也否認與秋生不和，更指當日秋生所言只是講笑，他表示秋生平日拍攝時喜歡爆肚，他說：「我視佢為師傅，好欣賞佢，有機會想拜佢為師。」至於秋生也禮尚往來表示想向Eason拜師學唱歌，還大讚Eason是現今樂壇少數唱得之人。至於有傳秋生因為嫌棄謝天華而推掉《Laughing哥前傳》，前晚秋生就表示已答允演出，他說：「啲報道自問自答，我幾時話唔拍，我點會嫌棄天華，而且個古仔幾好。」
此外，方力申前晚匆匆到場，對於有傳古巨基不續約金牌大風，令小方有機會成為金牌一哥時，他說：「冇收到風，我都好關心呢件事，因為希望一路都係原班人馬合作。」
採訪：何慧斯
攝影：陳慧安、陳俊強
