民建聯上星期舉行新領導層選舉後，噚日選出新一屆主席同四個副主席，一如所料，譚耀宗冧莊主席，副主席亦跟足劇本有兩張新面孔，分別係張國鈞同溫嘉旋，前者落選政治助理換來黨副主席，唔知算唔算焉之非福，溫嘉旋係政壇老將，重作馮婦，有何作為不妨留意。
官仔骨骨出口成文
較意外係秘書長分別由任職國泰嘅王舜義同沙田區議員彭長緯當選，彭長緯入黨多年，大家以為佢已經心如止水與世無爭，卻忽然上位，老驥伏櫪，志在長途定短跑呢？
同民建聯關係密切嘅工聯會，選出年僅39歲嘅吳秋北做新理事長，佢官仔骨骨，原來有「工聯會吳啟華」之稱，佢有幾似《妙手仁心》入面個程志美醫生，大家自行判斷，八方聽聞吳秋北對此暱稱唔太受落，老友間多數叫佢「吳揪得」，即係唔打得。工聯會中人話雖然佢望落手無縛雞之力，但唔打得卻好寫得，據說係工聯會文膽之一，正攻讀中國社科院文學批評博士，平日出口成文文縐縐，非今人作風。