惟有真實先可以感動人，電影同足球都一樣。最近社會寫實電影《天水圍的日與夜》，成為香港電影頒獎典禮大贏家；咁啱前曼聯球王簡東拿，亦有套片可望入圍今年康城影展嘅金棕櫚獎最終名單，戲名叫《LookingForEric（尋找簡東拿）》。
呢套片絕對唔係拍畀曼聯球迷睇，故事講曼徹斯特市一名郵差，離婚後爛泥扶唔上壁，好彩呢位曼聯球迷心中有簡東拿，經過不斷與偶像神交激勵後，終於一個蜈蚣彈翻起身重新做人。家全世界被金融海嘯搞到一身蟻，觀眾正好透過呢套戲重新叉電，捲起衫袖為明天而戰！
或入圍康城影展
呢套英國版《天水圍的日與夜》導演係06金棕櫚獎得主堅盧治（KenLoach），呢位72歲英國導演對簡東拿讚不絕口，「好少球員有咁嘅想像力，佢係天生嘅演員。」堅盧治從來唔用名人做演員，所以唔係擦鞋，「我唔係拍偶像片，我關注佢嘅內心世界，睇完套戲就知佢嘅真實一面。」
咁簡東拿點睇套戲呢？佢話：「我希望之後全世界會談論多啲曼聯迷，我有好多美好回憶留咗喺曼聯，好開心佢哋仍然喜歡我，呢種關係永存我心。」至於點同曼聯迷保持呢種關係，簡東拿話自己都唔知，「或者要佢哋先答到你。」係囉，各位香港曼聯迷，點解你哋對佢不離不棄呢？
簡帝拍戲叫好叫座
簡東拿1997年掛靴後，參演或執導過至少15部電影，口碑越來越好，希望周四《尋找簡東拿》順利入圍金棕櫚獎最後名單，順利出席下月康城影展啦！而呢套戲5月27日率先喺法國上映，英國就係6月12日，唔知香港片商會唔會引入呢？
講真，簡東拿今年先42歲，喺香港影壇可能嫌老，但性格演員喺外國好吃香，相信好快好似鮑姐咁爆出嚟㗎喇！而且佢當年飛踢水晶宮球迷，亦展示其功夫片潛質，話唔定第日同成龍大哥做對手戲，到時香港球迷就開心喇！