戴錯Bra唔係無得救，有心唔怕遲，去搵「Dr.Bra」求診就搞掂！喺OL間口耳相傳的銅鑼灣奇人蔡太，個個都話佢有「救胸」的本事，只要俾佢睇一睇，就可以幫你揀個啱你的Bra，仲可以3個月後返嚟「覆診」，根據胸形改善程度叫你轉過第二款。呢度日日排長龍唔憂做，到底點勁法？問吓啲客仔先。
總統Dr.Bra：日日見人龍
有行過銅鑼灣總統商場的朋友，相信成日都見到有條長長的人龍由地底排到上地面，心裏不禁有個問號：究竟咁多女人喺度排乜呢？一問之下，原來個個喺度排隊買Bra，佢哋話都係聽朋友口碑過嚟，而老闆娘蔡太就好犀利，着咗佢嘅胸圍可以收身之餘，長期戴仲可以將上圍升Cup，仲要好似睇醫生咁要過一排再返嚟「覆診」。可惜蔡太生意唔憂做，唔肯接受我哋訪問，不如問吓佢嘅客仔佢有幾掂？
每逢LunchTime同放工時間都排滿人，好多時仲排到上地面。
真實個案：生完仔一戴即瘦
通常大肚婆陀BB時都會狂食補品，為咗畀個BB吸收到足夠營養，但係好多時BB出咗世，新媽咪就要為收身減肥問題而煩惱。Frances生完BB已經諗住快速收身：「因為我餵人奶，所以胸形一定有變，加上如果停咗唔餵的話我驚個胸會下垂同縮細，所以想買Bra之餘着埋Bridge，起碼可以令胸形挺啲同Firm啲。聽朋友講銅鑼灣總統有個叫蔡太的會幫人睇胸矯形，去睇佢嗰陣，有三間房，啲女仔要除晒衫畀佢睇，佢會問你的心水款式例如棉質定喱士咁畀你試，基本上一着上身就睇到手臂同背脊瘦咗，即時度瘦咗平均1吋有多，着衫即刻靚咗，腰又直咗。我當時用咗約$1,200買咗兩個Bra、兩條Bridge同埋一個瞓覺戴的Bra，唔算貴，着三個月就睇到有收形效果。最好就係Bridge可以鎖緊Bra位，令胸部收緊喺固定位置，唔會出現『八字胸』。」
試戴收身Bra：胸圍即增
ModelKinki試戴感受
「我諗我會開始買嚟戴！因為一戴上身效果好明顯，手臂同背脊睇落即刻瘦咗，最好就係連腋下兩嚿脂肪都收得埋，唔使再怕有麒麟臂同虎背。之前好少睇呢類型嘅Bras，因為覺得啲顏色唔靚，來來去去都係咁好似好老土，無諗到真係咁Work！」
Yanny
23歲 學生
「之前無諗過自己有無戴錯Bra，但成日行過見到有咁多人排隊，就好奇排吓，試過蔡太啲Bra之後覺得着衫好睇好多！」
Yan
22歲 文員
「我比較鍾意着吊帶背心，所以會揀啲比較靚嘅款着，蔡太有時啲款式只可以着Tee先得，如果唔係就會露晒啲Bra帶出嚟，唔係太好睇。」
Me
23歲 學生
「年初開始睇蔡太，買咗一套Bridge加Bra，約四百幾蚊。因為本身胸形唔夠靚，戴咗之後覺得背脊瘦咗，胸形集中同挺咗。」
Mavis
25歲 記者
「去年開始幫襯蔡太，但夏天戴Bra又戴Bridge好熱，所以冬天先日日戴，身形有番Curve，腋下同背部肥肉都收得埋，戴咗3個月家陣背脊平晒！」
奇華特（28330188）
銅鑼灣總統商場地庫33A舖
查詢：
（b）PeachJohn（25776012）
專家話：收身內衣未必人人啱
收身矯形內衣係咪Work？理工大學內衣設計講師Kristina話，「其實現今着收形胸圍嘅女士比想像中多，有報告指出70%嘅女士戴錯Bra，係因為市面上嘅SizingSystem標準唔統一，所以次次買胸圍嘅Size都可能有變異。收身內衣能幫女士們收身，係因為專用布料同設計可以Shape番個身形，着咗之後明顯睇到要收嘅部位Firm咗同平滑咗。當然女士們仲要配合適當運動和均衡飲食，最重要係着得舒服，如果夾硬着會更加唔健康。不過我就建議發育中嘅女仔唔好戴收形Bra，因為太緊反而影響胸部發育，應該等發育完畢，如果有需要先至戴。」
