滙豐私人銀行昨向100人派大信封，雖然早已聽聞銀行短期內再度裁員，但員工接獲噩耗，一時間也難以接受，有被裁女職員哭着離開傷心地。經濟好景時，在滙豐私人銀行工作，每月收入可以高達400萬元，一個月人工已足夠購買一個私人物業，平日更是燕窩做早餐，但一場金融海嘯，不但令收入下降，最終連飯碗也保不住。
個人物品速遞回家
裁員陰霾昨日籠罩中環滙豐銀行總行13樓的私人銀行辦公室。員工批評，公司裁員手法傷透員工，「拉埋員工一邊，叫佢哋即刻走，搞到好似係員工做錯嘢咁，有啲仲喊住離開。」被裁員工只准持公事包離開，其他個人物品一律由資方速遞到員工寓所。一名倖保飯碗的員工稱，其實銀行生意並不算差，近月客戶更有增長，批評公司借勢裁員。
員工透露，銀行業績雖然下跌，但員工早前仍獲發花紅，即使是辦公室助理都有三個月花紅；經濟好景時，花紅更是三級跳。據了解，早兩年部份員工單是每月底薪連佣金便高達400萬元，年終花紅更高達60個月至逾100個月薪金。由於這班投資精英屢賺大錢，部份人除購買名車及名錶，更經常買樓投資，「有人會用一個月400萬嘅人工同佣金買樓，試過上晝買君臨天下一個單位，下晝就已經成功放盤，淨賺20萬元。」
好景時燕窩做早餐
這班精英員工日常生活消費非常豪爽闊綽，「佢哋會買燕窩花膠返嚟公司，叫茶水部阿姐燉嚟做早餐，中午就會去馬會會所食飯，又或者去食鮑魚，差唔多日日請同事食下午茶，Cova已經食到唔食，文華、四季呢啲五星級酒店都有。」該名員工補充：「不過，佢哋呢班人壓力好大，夜晚瞓得唔好，擔心會輸錢，呢啲錢唔易賺。」本報記者