噚日華華去咗gaimAsia2009演講會，大會原意係畀基金同投資銀行「交流吓」，但因為請到「新末日博士」魯賓尼做演講嘉賓，好多嘉賓特登為佢專程飛嚟香港捧場。
魯賓尼講嘢帶有東歐口音，似足芝麻街入面嘅貴族殭屍TheCount。今次同之前有少少唔同，就係魯賓尼把聲好似有少少感冒咁，兼夾咳足全場，要成日飲水潤喉，似乎連日演講令佢出現少少疲態。
聽佢助手講，魯賓尼訪港行程已full晒，華華想約佢食早餐，又或者夜晚「去浦」佢都冇時間。
噚日魯賓尼演講內容，基本上同前日佢喺香港總商會講嘅一模一樣，但係佢就將演講時間縮短幾分鐘，而內容就冇漏，兼且仲有心情搞吓氣氛，話會後會去shopping，要刺激香港總體消費咁話喎。
飛德國繼續演講之旅
講咗咁耐，大家係咪好想聽魯賓尼嘅演講呢？不過按照行程，噚晚佢已經離開香港，要聽佢演講，恐怕要等下次，或者飛去歐洲，因為佢話，下一站會去德國繼續佢嘅演講之旅。