PS2同PSP打到天昏地暗嘅芒亨今次打落Wii，遊戲內容雖同PS2版《MonsterHunterG》大致相同，但經過微調、加入支援闊屏幕，Hunt起上嚟零舍逼真；不過芒亨迷更大着眼點，都放喺跟送嘅《MonsterHunter3體驗版》上，呢隻先係真正為Wii而設計嘅芒亨，揸住Wiimote、Fling掣殺怪，爽噢！
記者：許福合
攝影：伍慶泉
Model：Mandy@PureModels
芒亨G非主菜？
乜嘢叫妹仔大過主人婆？今次主菜Wii版《MonsterHunterG》硬係有種配角味道！遊戲原作05年PS2推過，今次再登陸Wii翻叮，Capcom都有為系統加入微調；畫面首度支援闊屏顯示（PS2版都無），即刻搵部47"LCDTV試玩，雖則畫面感覺略鬆，但「拉闊」咗、打怪更具迫力；遊戲更可透過任天堂Wi-Fi作4人連線對戰，可惜要畀錢先玩到。另外要留意，G版並唔支援體感操作，要使用Classic版手掣先玩到。
入手攻略！特別版送手掣
今次《MonsterHunterG》並無行版！街上水貨主要分特別版同普通版；基本兩個版本都會跟送《MonsterHunter3體驗版》，但特別版會多送芒亨「特製原創樣式WiiClassic手掣」，用嚟玩芒亨G固然就手，對芒亨Fans更是必買收藏品！
芒亨3初體驗
芒亨3一直係Wii迷矚目作，首玩體感操控打鬥，為芒亨遊戲注入新鮮元素；Capcom表示，體驗版進度與上年東京遊戲展相若。開場版面還有體驗版字樣，但OpeningCG則暫時欠奉！遊戲可狩獵嘅怪物，包括鳥龍種嘅德斯傑基（難度1星）同庫魯佩可（難度3星）。遊戲角色有男女選擇，武器選擇有單手劍、大劍、鎚、輕弩槍、重弩槍等。
光明磊落專打正面
《MH3》角色移動同《薩爾達》差唔多，攻擊時則要揮動Wiimote；當血戰一場後，發覺攻擊範圍只會在角色的正前方，所以殺怪訣竅係一邊移動走位避怪，又要同步用十字掣校正「攻擊範圍」，感覺幾踢腳吓！體感版內小怪危險性不大，甚至會逃跑，但遇到Boss級獵物，會有衝撞動作，反應快兼使出擋格就可避免大量損血。另外武器用完記得按「1」掣收起，否則會影響行走速度。