禮拜一，孫柏文寫咗篇「美股short得」嘅文。到特區時間夜晚，花旗國股市即裂口低開，跟住就一路跌到收市。大家一定覺得我又認屎認屁，會話啲花旗國投資者，搵繙譯睇完我篇文後，就拋貨。但今次連我都唔敢認。
不過大家有冇發覺禮拜一嘅跌市，如果你當晚或第二朝睇傳統主流傳媒，對跌市係一頭霧水。原因係嗰晚導致市場拋貨嘅消息佢哋唔敢報。個消息就係話壓力測試結果已外流，結果非常差。好多料爆，其中3點包括：
傳壓力測試 美16銀行唔掂
1）19間銀行，16間會肥佬被揭係資不抵債。
2）16間肥佬銀行中，冇一間頂得住還款率惡化。
3）16間中任何兩間要國有化，FDIC（美國聯邦存款保險公司）即時冇錢。
咁震撼，點解主流傳媒唔報？理由有兩個：
第一，太震撼。有如當年克林頓搞囡囡一樣，唔敢報。如果消息係流嘅就玩完。所以同上次一樣，網站報道。
第二，爆料嘅屬「白人大晒主義」嘅網站，雖然之前已踢爆過政府內部消息，不過財經傳媒唔敢信。
究竟唔報道啱定唔啱就其次，最重要係你唔知，但有人信兼拋貨，搞到市跌令你輸錢就大鑊。
你可能問，個網站係咪死好彩，嗰日出消息咁啱遇跌市呢？如果市場覺得呢個網站消息係冇料到，跌市只係咁啱，財政部噚日就唔使突然發聲明澄清。
之前個個話啲銀行全部都會pass，其實忽略咗一樣嘢。如果奧巴馬真係想控制銀行，話佢哋唔掂，係注資做控制性股東必然要行嘅一步。19間會有16間唔掂？出奇係仲有3間OK！
孫柏文
http://phatdat.blogspot.com