城大學生會嘅編委早排想出本六四特刊但被評議會質疑，編委會喺最新一期嘅《城大月報》探討呢件事，點知封面前言寫咗「一九八九年六月四日，中共中央總書記胡耀邦突然病逝……」胡耀邦當年4月15日去世，連基本史料都搞錯，即刻遭同學、網民狂轟。
寫呢段文字嘅黃銘浩同八方解釋，其實唔係唔知胡耀邦去世日子，只係行文時出錯，噚日已經喺民主牆向同學解釋，佢自己都好唔開心，本來想為六四20周年做啲嘢，結果功虧一簣。月報封面又大大隻字寫住「學生會，妳怎可以忘記『六四』？」唔少網民都唔明點解學生會要用個「妳」字。八方贊成對同學仔應該寬容啲，但呢個故事教訓年輕人，不但要認清歷史，仲要學好中文。