激起全球華人公憤後，成龍知衰冇面獻世，就算新戲《新宿事件》上畫都唔敢見人要龜縮，喺北京同台灣歌手周蕙拍MV，講明不回應「奴才言論」，其經理人繼續死撐指傳媒斷章取義，北京唔想受成龍拖累，外交部發言人姜瑜噚日喺例行記者會上，被問到成龍言論時，話「那是個人言論，我不對此進行評論。」
香港高官亦學成龍玩龜縮，煲呔噚日開完行會，記者問佢香港係咪好亂，佢今次唔同成龍鬥噏，陰陰嘴笑坐車離開；政務司司長唐唐則一邊苦笑一邊頭擰擰，吊吊fing走人，免得講多錯多。行會成員鄭耀棠就扮儍，一味反問記者：「係咩？係咩？」
梁振英趁機抽水狂插
近嚟越來越高調嘅疑似特首候選人梁振英卻把握機會抽水，出行力猛插成龍，表示唔同意成龍講法，佢話自己公幹環遊地球80幾個圈，去過好多地方，同其他大城市比較，香港一向好自由，不過冇人濫用自由，社會秩序井然，根本唔能夠用亂嚟形容。
好多人認為成龍影衰香港，要求撤換旅遊大使，旅發局發言人話未有任何決定；旅遊界議員謝偉俊支持換畫，因為成龍在位多年，「已經冇乜新鮮感」，旅發局可考慮請「公職王」陳智思、前一哥李明逵做代言人，兩人形象健康，至於佢自己有冇興趣取而代之，佢話唔評論。謝超人又指成龍歪論「唔代表香港人嘅價值觀」，佢自己絕對唔認同，「正正相反，香港其實好多地方自由仲未夠。」
網民不滿成龍情緒激烈，無數人支持送佢去北韓，滿足佢被管束做奴才嘅願望，有國際巨星移民，八方相信北韓政府隨時射多支火箭慶祝。網民又發起一人一信畀曾頒發榮譽學位、獎項畀成龍嘅機構，要求褫奪其名譽銜頭，政府亦唔好再委任佢做公職，費事成龍言行陀衰家。
台灣方面，綠營人士去成龍台北分公司抗議，狂嗌「成龍滾蛋」口號，又舉起「無恥藝人、敬請閉嘴」標語，更喺《新宿事件》海報上貼上「奴」字貼紙。台灣正舉行縣議員選舉，民進黨候選人趁勢拎成龍祭旗，譏諷佢既然不愛自由，應該滾回中國做奴才！
mailto:[email protected]