姚嘉妮前日下午為老公林祖輝誕下一名重6磅半女嬰，暫取英文名Kyra，B女一頭濃髮，精靈可愛。初為人父的祖輝更陪入產房剪臍帶。小千金萬千寵愛在一身，不少圈中人更爭着上契。
姚嘉妮前日下午誕下小千金Kyra，母女平安，初為人母的她因難頂陣痛，故打無痛分娩針順產，仍在醫院的姚嘉妮說：「個女出世我感動到喊，我實俾個女恰。我唔想縱個女，但好失敗，我餵奶時個女可能未適應，搞到佢喊，我咪不停對佢講對唔住，連我阿媽都笑，阿媽話個女似祖輝，但喊起上嚟似我喎。」她謂希望產後拍纖體廣告。
圈中人爭上契
林祖輝則覺得B女靚的地方似太太，他又禁不住喜悅說：「做爸爸感覺好得意，第一眼見個女出世好感動，真係願意為佢做牛做馬。BB好多頭髮，又手長腳長。佢真係萬千寵愛，因為佢喺嘉嘉家族中係第一個太孫，我係細仔，阿爸抱住個孫唔放手。」
Kyra剛出世，已有不少圈中人爭相上契，林祖輝說：「伍詠薇認咗做大姨媽，陳敏之係阿姨，楊怡係契媽，仲有一個係有泰國周潤發之稱嘅ChatChai（察差），佢哋以前合作過拍劇，所以好熟。」
林祖輝笑言一定很多人縱女兒，他自言做父母必有奸有忠，他會做奸，太太做忠，他不會放縱女兒。今次生女用了數萬元，他覺得是值得，而且不少嬰兒用品也有贊助，讓他們慳回不少。
採訪：陳寶明
