出爐金像影后鮑起靜繼前日火速收拾得獎心情投入拍攝新片《月滿軒尼詩》後，噚日又馬不停蹄返到大埔亞視總台拍《開心大發現2009》，喺亞視29年嘅鮑姐人緣甚廣，仲深得台前幕後嘅工作人員喜愛，所以噚日製作部嘅工作人員就特意為鮑姐送上蛋糕祝賀佢封后，而鮑姐無論去到那兒都獲得亞視上下嘅祝福，難怪佢被封為亞視之寶。亞視方面亦會乘勢出擊為鮑姐拍攝特輯《金像影后鮑起靜》，節目會喺嚟緊星期日（26號）晚播映。
「唔會刻意加價」
無綫因刪剪鮑姐嘅致謝辭而遭炮轟，事後無綫補鑊，分別喺《東張西望》等節目重播鮑姐嘅片段外，又將足料頒獎禮安排周六喺高清翡翠台播出，鮑姐話：「無綫如果咁做好好，因為呢個唔關兩個電視台事，係電影界盛事，當晚可能時間太緊迫，自己好明白，唔會嬲。」不過鮑姐坦言做影后後唔會刻意加價，佢話拍《天水圍的日與夜》時連許鞍華都話佢個價係茄喱啡價，不過佢覺得今次有咁好回報已經係最大片酬。
自爆戙起腳飲湯
另外，噚日凌晨出爐影后鮑姐同影帝張家輝接受吳君如主持嘅商台節目《嘩！嘩！嘩！打到嚟！》訪問，君如等人稱鮑姐為「ATV影后」，鮑姐自爆得獎回家後與丈夫方平同女兒齊齊戙起腳喺廳中飲湯，好搞笑。
雖然榮升影后，不過鮑姐對前路睇得甚淡：「我有透視眼，我覺得前面條路唔會變，我哋呢啲年紀做主角機會真係絕冇僅有，我永遠係綠葉，自己都好樂意，從來冇抱怨。」
鮑姐仲承認當初都覺得拍《天》片係奇蹟，因為佢覺得劇本好平淡，都替導演擔心，唔明點解佢會拍，仲要搵佢同陳麗雲做主角，佢笑話：「你話驚唔驚呀，自己都驚驚哋。」鮑姐嘅愛女仲大讚其母係100分嘅媽咪同演員。
