第13屆上海國際汽車工業展覽會現正於上海國際博覽中心舉行，逢雙年舉行車展都依然夠吸引力，尤其係車界巨頭更嚴陣以待，當中香港車迷熟悉嘅「波子」、寶馬更齊齊出招：你有創新四座GT跑車，我有全球首發兼亞洲首發車及概念車，不過令我最興奮嘅莫過於MINI嘅概念車Crossover！
記者、攝影：梁美甜
SpecialThanks：PorscheCentreHK
MINICrossover超現實
坦白講，展場入面真係有唔少概念車，之不過要數當中最印象深刻嘅絕對係MINI部Crossover。呢部車歸類Concept，但由外形以至內裝都好實在具體。MINICrossover可以話係「家族長人」，四門車身超過4米，成個車頂係風琴式軟篷。內裝設計超現實有創意，中控設有立體MINICenterGlobe，一個地球儀集導航、通信及娛樂功能。
「波子」寶馬鬥搶
要講高度注目，要數「波子」同寶馬，呢兩個同係全力進攻中國市場、市場佔有率也在激增嘅品牌，一個贏勢一個贏陣。噚日我哋睇過嘅PorschePanamera系列外，展場內仲有全新量產版CayenneGTSPorscheDesignEditionIII等15部車齊齊列陣，而寶馬則擺陣來個全球首發X5M同7系760Li，矚目嘅仲有概念車5系GranTurismo，姊妹品牌MINI超可愛有型MINIE及MINICrossover。除了概念作，BMW陣營中最叫人駐足嘅要算一直傳言多多，叫車迷充滿期待嘅X5M及X6M，賣弄高性能嘅SUV，充滿攻擊性嘅形象也叫人一見難忘。
其他搶鏡新車
中外概念盡出
今次車展，要認真數，國內車廠絕對夠撐，所謂全球首發新車，大部份都係由同胞製造推出，概念車款更多不勝數，款款都創意十足突出有台型，創造力可媲美世界龍頭歐洲車廠。
東洋組
清，係Mazda亞洲首發概念車KIYORA，中譯Mazda清，驀然回首即俾佢對電眼電親。以「水」為設計元素，簡單而明亮，車身內外用上大量波紋裝飾，流露一股清澈透明感。其他東洋組概念車主要以的骰可愛為主，與電能或混能環保車款相近。
Mazda清 水漾哲學
由外而內，設計都如富動態嘅水。
NissanNUVU 可愛電能
粉色超可愛，全玻璃車頂方便吸收太陽能，內裝樹枝狀嘅太陽能板同車牌上塊樹葉來個配合。
三座位電動車，前排係可收摺電動椅。
歐洲組
法國品牌標致可以話係會場最綠化展區，用上大量綠色植物及有魚仔游水嘅水池，或許就係要突出環保車系列。RCHybrid4全車線條強調以空氣動力學，充滿流線美。車尾邊角銳利，尾燈更有點像六十年代504車，勁有超跑味道，1.6公升THP引擎搭配70kW發電機，加埋電控六前速棍波箱，可以用四種驅動模式，動力環保性能兼備。
中國組
中國車廠超多汽油、混能、電動概念車，可以話舉目皆是，一個不留神便會錯過。最印象深刻係呢部長安E301，車身線條硬淨又有肌肉感，車頭部份設計獨特，十足眼鏡，最特別係車側透明，是力量與科幻的混合體。
靚女列陣
可以話逢車展就例必有靚女睇，今次見到嘅，又多又靚，絕對係美女如雲，我部相機入面，靚女同靚車嘅相，係平分秋色！
展場大睇到眼花
今次上海車展用晒展場全部11個室內展館、9個室外臨時展館及室外場地，參展面積超多14萬平方米，比上屆大足20%，參展企業達1,500間，齋睇都行到腳跛兼睇到眼花，而且仲有表演同遊戲。車展展期由4月22至28日，22至23日為專業觀眾參觀日，24至28日則為公眾參觀日，普羅大眾一般於公眾參觀日入場。
日期：4月24-28日（公眾參觀）
地點：上海浦東龍陽路2345號上海國際博覽中心
票價：通用票¥80、當日票¥50
網址： http://www.autoshanghai.org
後記：攰到嘔
我哋中國今次真係威，上海車展吸引全球行內嘅高度注意，海內外參展商超多，車迷絕對會樂此不疲。我就行足十幾個館之後，相機電耗盡，可容5、6百張相嘅1G記憶卡只剩單位數容量、背脊個袋邊行邊攞資料越揹就越重，最最最誇係，對腳行到上落幾級樓梯都震，坐低起身差啲唔夠力都唔想停，因為，實在太多新車、型車同靚女喇！