無綫又開拍新古裝劇，劇名叫做《蒲松齡》，噚日大堆藝員喺將軍澳電視廣播城進行開鏡拜神儀式，鍾嘉欣同陳法拉兩位姐仔擔正做女主角，小生方面就稍欠新意，又係陳錦鴻同馬浚偉，但劇情都幾鬼馬，噚日就見到陳法拉以一個胸部微微隆起嘅公子look現身。
陳法拉女扮男裝後個樣都幾入型入格，唯一出賣佢就係身材，原來戲中有段錯摸斷背，佢話：「戲裏面交代我扮男仔偷偷落山，我第一次扮男仔，動作大、瀟灑，有時要擘開雙腳坐，又惹嚟龔嘉欣誤以為我係公子鍾意我，後來要我顯露女兒身先冇事。」
「佢造型好英」
雖然扮男仔，但一望陳法拉個胸就自有分曉，始終佢係有料之人，企喺側邊嘅鍾嘉欣見到法拉一副男相，都忍唔住蹺住佢隻手影相，一邊笑笑口。
鍾嘉欣後來話：「佢個造型好英，但我有時都會笑佢，男仔應該係平胸，你睇，見到法拉佢好明顯遮唔到身材，我就未正式演過男仔，都想試吓。」