香港出咗個香港之恥——大鼻蟲，估唔到周日英足盃4強愛華頓淘汰曼聯，英球壇亦爆出兩個英國之恥：溫布萊球場同曼聯領隊費格遜。「且慢！」各位紅魔球迷咪掟嘢住，聽細佬慢慢講。
先講造價7.5億鎊（約84億港元）嘅溫布萊球場。費格遜話，睇完上周六阿仙奴負車路士場英足盃4強後，驚到周日收起主力同老將，驚死鬆泡泡草地會整傷班愛將咁，「傳波都唔順暢，惟有派年輕人落場啦！」咁咪即係送班後生仔去死？好狠心啫！
呢場波吸引88,141名球迷入場，破咗英足盃4強入場人數紀錄（阿仙奴對車路士有88,103人入場），好可惜球迷見到嘅係曼聯二隊。草地情況好差，不時出現射波跣腳、鏟波鏟到草皮飛起嘅畫面；結果90分鐘連加時都係「窿對窿」，球迷亦睇到擘大口得個窿，互射12碼愛華頓贏4:2。
不敵愛華頓賴埋球證
不過，我求大俠當晚好有共鳴，皆因當年香港大球場俾溫布萊管理公司管到一鑊泡，當時仲以為英國佬玩嘢；點知佢哋原來真係淨係識起球場，唔識鋪靚草地，真係笑死人囉！5月底英足盃決賽之前，溫布萊仲有6場波要打，到時個場仲爛，車仔同愛華頓要小心啦！
咁費Sir又衰咩呢，之唔係賴完地爛賴球證囉！球場爛雙方都有影響，唔通曼聯球員矜貴啲，影響特別大？佢仲話球證萊利礙於被指係曼聯球迷嘅報道，所以韋碧克禁區內被菲臘積基爾卡整跌，唔敢判愛華頓12碼喎！嘩，唔通球證所有判決都要有利於曼聯，先叫公平？費Sir，做人講嘢咪咁大鼻蟲啦！
雖然5冠王落空，但根據英國博彩公司PaddyPower，曼聯嘅英超、歐聯奪冠賠率只得3倍；車仔英足盃、歐聯雙冠就5倍，加埋英超做3冠王就80倍。足智彩英足盃奪標賠率，車仔1.36倍、愛華頓就2.85倍。費Sir、軒迪克，邊個威盡08/09球季呢？與其靠把口廢噏，不如場上決勝負啦！
話你知：大球場都爛過
溫布萊爛草地成眾矢之的，其實早年大球場都有同一經歷。94年香港大球場完成重建後，亦由英國溫布萊公司管理；當時草地異常差劣，被批評為「薯仔田」。
有份踢大球場重開後首場賽事，於表演賽對巴西聖保羅的前南華隊長丘建威表示：「可能當時的草生得未夠實，輕輕一腳已經踢起大塊草頭。」政府其後委派草地專家改善，至98年草地情況始見穩定。