米老鼠盧維思離開政府後無官一身輕，噚日身穿便服現身外國記者會（FCC），大爆政府秘辛，其中一單仲同六四有關。話說89年盧維思係資訊統籌處副處長，6月3號晚佢隊咗一樽平酒，搞到自己貓晒，6月4日凌晨3點，收到個英國報紙嘅記者打電話嚟，同佢講坦克車已經開入天安門廣場，問佢香港情況同港府有乜反應。
事後檢討有兩個教訓
當時米老鼠唔太清醒，又好頭痛，聽到對方講坦克車、長官呢啲字，唔知點答之際，就吐咗句「thesituationinHongKongisfraught」出嚟，然後即時收線，第二日見報個英國記者照寫，話港府高層評論六四鎮壓時指「Thesituationwasfraught」，即局勢令人擔心。
米老鼠話事後檢討，呢件事畀佢兩個教訓，一係答記者問題前千祈唔好飲平酒，二係自己唔熟嘅嘢唔好亂答。第二個教訓，對陳一諤同成龍嚟講都應該好有啟發性。
米老鼠叫人小心講嘢，但佢噚日講番維港巨星匯事件，仍然滿腔怒火，話自己花咗三百萬司法覆核成功，「每個仙都使得好抵」。佢話嚟緊仲會出本書，講番當年維港匯事件真相，由於當年政府審佢過程中，文件連一個局長嘅名都冇提，所以佢本書名就叫做《NoMinister》。米老鼠又忍唔住為公務員發聲，話近排蘇錦樑用卡片當入薪證明單嘢，相信冇公務員會諗到咁做，因為凡係公務員出身嘅，都知道咁做會令同事好尷尬。
講到迪士尼，佢話早排先同孫女同仔仔去過；對於海洋公園受歡迎，佢話可能係因為裏面有啲咬來咬去嘅動物，似乎想寸早排海洋公園爆出中華鱘死亡事件，點知在座有觀眾反問：「係咪Zeman（海洋公園主席盛智文）？」搞到米老鼠笑唔停口。佢仲自嘲話，當年政府搵佢同迪士尼談判，係貪佢結過兩次婚，慣咗畀人羞辱喎。
mailto:[email protected]